ارشد شریف نا مرک آ دروغ انا بیانیہ اس جوڑ کرسا مخلوق ءِ گمراہ و ادارہ غاتے بدنام کننگ نا کوشست کننگا، شفاف جاست وپاست آن سائفر و ارشد شریف نا مرک اتون گنڈوک راستکی تا تاہ   اسکان سرمننگ بھاز المی ءِ، لیفٹیننٹ جنرل بابر افتخار

راولپنڈی۔ 27 اکتوبر (اے پی پی) پاک فوج انا شعبہ تعلقات عامہ( آئی ایس پی آر) نا سروک لیفٹیننٹ جنرل بابر افتخار پارینے کہ ارشد شریف نا مرک آ دروغ انا بیانیہ جوڑ کرسا مخلوق ءِ گمراہ و ادارہ غاتے بدنام کننگ نا کوشست کننگا، سائفر و ارشد شریف نا مرک اتون گنڈوک راستکی تا ماس اسکان سرمننگ بھاز المی ءِ، ارشد شریف ملک ءِ ہلسا ہِننگ خواتوکہ، اودے بیوس کننگاکہ ملک ءِ اِلے، داباندات نا شفاف جاست وپاست بایدے مرے، سائفر نا سٹی آ کِسہ نا حقیقت تون مرمر اسکان ہچ ءُ تعلق اس اَلوکہ، قوم و فوج انا نیام اٹ خلیج ودی کننگ نا کوشست کننگا، نن آئین نا رداٹ تینا کڑد ءِ ادا کننگ اُن، غدار و سازشی مننگ کپنہ، آئین ادارہ غاتا کڑدار کشی و اوفتا برخلاف ہیت کننگ نا موکل تفک، لانگ مارچ جمہوری حق ءِ ، اسٹ اسہ ہم ملک اٹی نزوری ودی کننگ کن الیپنہ۔ پنچ شنبےنادے آ ڈی جی آئی ایس آئی لیفٹیننٹ جنرل ندیم احمد انجم تون اوار نیوز کانفرنس آن تران کرسا اوپارے کہ اینو مچ آ دنیا ٹی رہینگوک آ کشمیریک تہاردے اڈتننگ ءُ۔ اوپارے کہ پاکستانی قوم مہالو ہم کشمیری ایلم تتون سلوک ئسک ، اینوہم اوفتے تون سلوک ءِ و پاکستانی قوم مدام کشمیری تتون سلک۔ اوپارے کہ داکانفرنس صحافی ارشد شریف نا مرک و اونا سوب آتا احاطہ ءِ کننگ کن اڈتننگا۔ ارشد شریف نا مرک انا بابت اسہ دروغ انا بیانیہ اس جوڑ کننگا و مخلوق ءِ گمراہ و ادارہ غاتے بدنام کننگ نا کوشست کننگا۔ ارشد شریف نا مرک آ نن غٹ ڈکھیااُن، صحافی ارشد شریف نا خاہوت تون سلوک اُن، ارشد شریف خواری کش ءُ صحافی اس ئسک۔ اوپارے کہ راستکی تا درک ءِ خلنگ المی ءِ، سائفر و ارشد شریف نا مرک اتون گنڈوک راستکی تا تاہ اسکان سرمننگ بھاز المی ءِ، ننکن دا بھاز حیرانی اس ئسک کہ اسہ کاغد اسے نا ٹکر اسے چست کننگا و سٹی ءُ کِسہ اس جوڑ کننگا۔ سائفر نا سٹی آ کِسہ نا حقیقت تون مرمر اسکان ہچ ءُ تعلق اس اَلوکہ۔ نیشنل سیکورٹی کمیٹی ءِ پاننگاکہ سائفر سفیر نا ذاتی رائے ءِ۔ ارشدشریف سائفر آ ہم چندی پروگرام تے کرے۔ سائفر آ آئی ایس آئی نا جاست وپاست آتے الس نا مون آ اتنگ خواہسکہ۔ نن ہمووخت انا حکومت آ اِلان کہ او راستکی تے الس نا مون آ اتے۔ سائفر نا بابت سفیر نا رائے ءِ تینا سیاسی مسخت آتیکن کاریم اٹ اتنگا و قوم و فوج انا نیام اٹ خلیج ودی کننگ نا کوشست کننگا۔ نجی ٹی وی چینل اے آر وائی نا کمک اٹ فوج انا برخلاف مخصوص بیانیہ ءِ مون آ دننگا۔ گمراہ کن پروپیگنڈا غان پد ہم پاک فوج تحمل نا درشانی ءِ کرے۔ اوپارے کہ ہمووخت آ ہم پاننگاکہ سیاست دانک اسہ ایلو تون تولسا ویل آتے ایسر کیر۔ فوج انا برخلاف سخت تنقید آن پد ہم ارشد شریف نا بابت ننا است آتیٹی ہچ ءُ منفی خیال اَلوکہ، اسہ تھریٹ الرٹ اسے مون آاتسا ارشد شریف ءِ بیوس کننگاکہ او ملک ءِ اِلے۔ سلمان اقبال تینا اسہ پروڈیوسر اسے پارت کرے کہ زوت آن زوت ارشد شریف ءِ ملک آن پیشن گدریفے۔ ارشد شریف ملک ءِ ہلسا ہِننگ خواتوکہ۔ ارشد شریف نا کراچی آن سیٹ بُک ئس ولے ارشد شریف پشاور آن دبئی آ روانہ مس۔ ارشد شریف دبئی آن کینیا ہموتم آ روانہ مس ہراتم اونا ویزہ نا معیاد چٹا۔ ننا حوال نا رداٹ اسہ ہم سرکاری آفیسر اس ارشدشریف ءِ دبئی ءِ اِلنگ آ بیوس کتو۔ ارشدشریف ءِ پدریسہ باور کرفنگا کہ ملک آ پدی بفیس، اودے خلنگک۔ دیر اس ارشد شریف ءِ دبئی آن کینیا غا ہِننگ آ بیوس کرے؟ ۔ اوپارے کہ ارشد شریف نا مرک انا شفاف جاست وپاست مرے۔ ارشد شریف نامرک آن دیر اس فائدہ ہرفنگ ءِ، نن غٹ انکوائری کمیشن نا رپورٹ نا انتظار ءِ کین۔ اوپارے کہ ننے آن مستین اٹ ہرا ردینک آک مسنو ، تدوک آ 20 سال آن اوفتے تینا دتراٹ سلنگ اُن۔ نن نزور مننگ کینہ، ننے آن غلطی مننگ کیک ولے نن غدارو سازشی مننگ کپنہ۔ ڈی جی آئی ایس پی آر پارے کہ اسہ متحدہ قوم اس چیلنج آتا مقابلہ ءِ کننگ کیک۔ آئین ادارہ غاتا کڑد کشی و اوفتا برخلاف ہیت کننگ نا موکل تفک۔ ارشد شریف کیس انا جہانی کہول آ ساف و شفاف جاست وپاست مرے۔ اوپیدوار کرے کہ جاست و پاستی کمیٹی آن آئی ایس آئی نا ممبر ءِ دانستہ کشنگا تانکہ شک و شبہ غاتا اندیشہ سلپ، تنقید ہر اسٹ نا حق ءِ ، ادارہ غاتا دفاع ءِ حکومت وخت کیک، پوسکن آ آرمی چیف انا تعیناتی تینا وخت آ مریک، ملک ءِ مون تروک چیلنج آتا مون ءِ توننگ کن غٹ ادارہ غاک کاریم کننگ ءُ۔ ڈی جی آئی ایس پی آر پیدوار کرے کہ پاکستان ءِ پیشن نا وڑاٹ ہچ ءُ خطرہ اس اف۔ ملک ءِ مون تروک چیلنج آتون مون تننگ کن ادارہ غاک کاریم کننگ ءُ۔ ننا قوم اٹی بھاز جوزہ ارے۔ پاکستان ءِ اگہ خطرہ ارے تو نزوری آن ءِ۔ سیاسی و راجی بے سگی آن نزوری ودی مریک۔ پاکستان نا آئین شریعت نا رداٹ ءِ۔ آئین اٹی لکھوک ءِ کہ ادارہ غاک تینا کڑد ءِ آئین نا رداٹ ادا کیر۔ مستین اٹی کروک آ ردینک آتا سوب آن ننے آ اینو ہم ہور ہرفنگک۔ نن مستین نا ردینک آتا بھلو نہاد اس تسونن۔ ملک انا ہرمشکل اٹی پاک فوج مون آ بسنے۔ داوخت آ ڈی جی آئی ایس آئی لیفٹیننٹ جنرل ندیم احمد انجم پارے کہ ارشد شریف نا کیس تینا ایسر اسکان سرمتو تو اونا بھلو نسخان اس مریک، کنا اطلاع نا رداٹ ارشد شریف نا زند ءِ پاکستان اٹی ہچ ءُ خطرہ اس الوکہ۔ ارشد شریف نا کنا ماتحت آفیسر آتون گچین تعلقداری ئسک۔ اوپارے کہ کینیا نا تینا ہم منصب تون رابطہ ٹی اُٹ۔