جموں وکشمیر اٹی بھارت نا ودوک آ ظلم ڈیہہ نا امن کن خطرہ اسے، قائم مقام گورنر خیبرپختونخوا

پشاور۔ 27 اکتوبر (اے پی پی) قائم مقام گورنر خیبرپختونخوا مشتاق احمد غنی پارینے کہ جموں وکشمیر اٹی بھارت نا ودوک آ ظلم ڈیہہ نا امن کن خطرہ اسے۔ داخیال آتا درشانی ءِ او کشمیر تہار دے انا وخت آ کشمیری الس کن تینا اسہ کلہو اسے ٹی کرے۔ اوپارے کہ 27 اکتوبر 1947 آ بھارت واک انا زور آ جموں وکشمیر آ کوزہ کرے و کشمیری الس ءِ بیدادی نا شست کرے ولے کیہی دہائی گدرینگ انگ آن پد ہم مظلوم کشمیری الس آ بھارتی ظلم انا چرجوئی چٹنگ کتنے۔ اوپارے کہ بھارت تینا ظلم اٹ کشمیری الس ءِ اوفتا حق خودارادیت نا دوئی کننگ و آجوئی نا جہد آن دزکش کننگ کپک۔ قائم مقام گورنر خیبرپختونخوا پارے کہ پاکستانی الس بھارتی ظلم انا برخلاف اولیکو دے آن کشمیری الس تون سلوک ءُ و سلرہ و پاکستان ہروارآنبار ہر پڑآ کشمیری الس نا اخلاقی و سفارتی مخ تفی ءِ برجاتخک۔ اوپارے کہ بھارت نا جموں وکشمیر اٹی ظلم، کشمیر نا خصوصی حیثیت نا چٹفنگ و انسانی حق انا پاش آن پاش خلاف ورزی کون آ انسانیت دشمن گام گیج دنیا کن لمحہ فکریہ ءِ۔ اوجہانی برادری و اقوام متحدہ غان خواست کرسا پارے کہ کشمیری الس آ برجا بھارتی ظلم ءِ ددمستی بند کرفنگے تانکہ کشمیری الس ءِ تینا آخبت نا فیصلہ ءِ تینٹ کننگ نا حق دوئی مننگ کے۔