27 اکتوبر تہاردے، کشمیری تا حق خودارادیت نا دوئی کننگ اسکان اوفتا سیاسی، اخلاقی و سفارتی مخ تفی ءِ برجاتخنہ، سلاہکار امور کشمیر و گلگت بلتستان قمر زمان کائرہ نا خصوصی کلہو

اسلام آباد۔ 27اکتوبر (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ پاکستان کشمیری تا حق خودارادیت نا دوئی کننگ اسکان اوفتا سیاسی ، اخلاقی و سفارتی مخ تفی ءِ برجاتخک، ساڑی حکومت کشمیر نا ویل آ جہانی رائے عامہ ءِ آوار کننگ اٹ اہم ءُ کڑد اس اداکرینے، 27 اکتوبر نادے ءِ نن تہاردے انا وڑاٹ اڈ ایتنہ، تاریخ اٹی اینونادے بھارت تینا کوزہ گیر فوج انا کمک اٹ کشمیر آ جلہو کرے۔ داخیال آتا درشانی ءِ او مقبوضہ کشمیر آ بھارت نا غیرکانودی کوزہ نا برخلاف تہاردے انا وخت آ تینا خصوصی کلہو اٹی کرے۔ اوپارے کہ 27 اکتوبر 1947 آ کشمیری تا برخلاف ظلم و جور انا ہندن ءُ داستان اس بناکرے ہر ااینو ہم برجاءِ، بھارت ہر بروک آ دے مقبوضہ کشمیر اٹی ظلم و جور اٹی ودکی کرے۔ قمر زمان کائرہ پارے کہ دہائی تا دا سفر اٹی کشمیری تا عزم و ہمت و آجوئی نا تڑپ اٹی ہچ ءُ کمتی اس بتنے، پاکستان کشمیری تا حق خودارادیت نا دوئی کننگ اسکان اوفتا سیاسی، اخلاقی ، سفارتی مخ تفی ءِ برجاتخک۔ کشمیر نا آجوئی پورو کننگ نامقدمہ پاکستان نا آجوئی پورو کننگ نا مقدمہ ءِ۔ سلاہکار امور کشمیر و گلگت بلتستان پارے کہ پاکستان نا چناچنا و ہر بندغ دا مقدمہ ءِ تینا است آن بھاز خڑک تخک۔ اوپارے کہ ساڑی حکومت کشمیر نا ویل آ جہانی رائے عامہ ءِ آوار کننگ اٹ اہم ءُ کڑد ادا کرینے، وزیراعظم محمد شہباز شریف و وزیرخارجہ بلاول بھٹو دا ویل ءِ دنیا نا ہرفورم تیا سرفہرست تخرہ۔ سلاہکار امور کشمیر و گلگت بلتستان پارے کہ نن دنیا نا رائے عامہ ءِ آوار کننگ و انسانی حق انا ادارہ غاتے بش کننگ نا کوشست آتے برجاتخنہ۔