کشمیری تیا بھارتی ظلم ءِ مچ آ دنیا ٹی تالان کننگ نا گرج ءِ، بنجائی سیکرٹری حوالکاری شاہیرہ شاہد نا ڈیجیٹل فوٹوگرافی و پینٹنگ نا نمائش نا وخت آ تران

اسلام آباد۔ 27 اکتوبر(اے پی پی) بنجائی سیکرٹری حوالکاری و شینکاری شاہیرہ شاہد بھارتی پروپیگنڈا نا گچین وڑاٹ مقابلہ ءِ کننگ کن بھارتی ظلم ءِ مچ آ دنیا ٹی تالان کننگ نا گرج آ زور شاغسا پارینے کہ ننے دنیا ءِ اصل حالیت آتیان معلومدار کروئی مریک۔ داہیت ءِ او پنچ شنبےنادے آ ڈائریکٹوریٹ آف الیکٹرانک میڈیا اینڈ پبلی کیشنز نا کنڈآن کشمیر تہار دے انا وخت آ کشمیری تا حالیت زار نا بارواٹی شعور تالان کننگ و جموں وکشمیر آ بھارت نا غیرکانودی کوزہ نا مذمت کن ڈیجیٹل فوٹو گرافی و پینٹنگ نا نمائش آن تران کرسا پارے۔ بنجائی سیکرٹری حوالکاری پارے کہ مچ آ دنیا ٹی کشمیری الس اینو تہاردے اڈتننگ ءُ، دادے ءِ ہرسال بھارت نامقبوضہ دامان اٹی غیرکانودی کوزہ نا برخلاف کشمیری الس تون یکجہتی نا درشانی کن اڈتننگک۔ اوپارے کہ نمائش نا بنداوی مسخت دادے انا اہمیت ءِ تالان کننگ آن بیدس بھارت نا غیرکانودی کوزہ ٹی جموں وکشمیر نا متکن آ ویل انا بارواتی طالب علم آتیٹی آگاہی ودی کننگ ءِ۔ اوعکسی نمائش اٹی طالب علم آتا اظہار کروک جوزہ غاتا ستا ءِ کرسا طالب علم آک تینا پینٹنگ آتا کمک اٹ کشمیری الس نا ڈکھیاتا پیدوار عکاسیءِ کرینو۔ اوپارے کہ ننے بھارتی پروپیگنڈا نا مقابلہ ءِ کننگ کن بھارتی ظلم ءِ مچ آ دنیا ٹی گچین وڑاٹ تالان کننگ نا گرج ءِ۔ اوعکسی نمائش نا اڈتننگ آ ڈائریکٹوریٹ آف الیکٹرانک میڈیا اینڈ پبلی کیشن نا کوشست آتا ستا ءِ کرے۔ بنجائی سیکرٹری حوالکاری نمائش اٹی بشخ ہلوک آ اسلام آباد نا چندی تعلیمی ادارہ غاتا طالب علم آتا نمائش ءِ سرسہب کننگ کن کوشست آتا ستاءِ کرے۔ داکان مست بنجائی سیکرٹری وزارت حوالکاری شاہیرہ شاہد فیتہ ءِ کاٹ کرسا نمائش نا بناءِ کرے۔