بھارت 75 سال اٹی چار لکھ کشمیری تے شہید کرے، حوال

سرینگر۔ 27 اکتوبر (اے پی پی) بھارت نا غیرکانودی کوزہ ٹی جموں وکشمیر اٹی بھارتی فوجیک تدوک آ 75 سال اٹی چار لکھ آن زیات کشمیری تے شہید کرینو۔ کشمیر میڈیا سروس نا کنڈآن اینو 27 اکتوبر آ تہار دے انا وخت آ جاری کروک اسہ رپورٹ اسے ٹی پاننگانے کہ 27 اکتوبر 1947 آن بھارت نا غیرکانودی کوزہ ٹی جموں وکشمیر آن 35 لکھ آن زیات کشمیری آزاد جموں کشمیر، پاکستان و دنیا نا ایلو بشخ آتیٹی ہمپنگ آ بیوس مسر۔ حوال اٹی پاننگانے کہ بھارتی فوجیک جنوری 1989آن 27 اکتوبر 2022 اسکان 96 ہزار 1 سد ءُ 40 کشمیری تے شہید کریر ہرافتیان 7 ہزار 2 سد ءُ 65 ءِ حراست اٹی وحشیانہ بیدادی و جعلی مقابلہ غاتیٹی شہید کننگا۔ بھارتی فوجیک داوخت اٹی 1 لکھ 65 ہزار 2 سد ءُ 93 بندغ ءِ دزگیر کریر، 1 لکھ 10 ہزار 4 سد ءُ 95 ہند و ایلو ماڑی تے بھس کریر۔ بھارتی ریاستی دہشت گردی ٹی داوخت اٹی 22 ہزار 9 سد ءُ 51 زالبول جنوزان وخت اس کہ 1 لکھ 7 ہزار 8 سد ءُ 83 چناچوری مسر۔ بھارتی فوجیک جنوری 1989آن داتم اسکان 11 ہزار 2 سد ءُ 56 زالبول آتے بے حرمتی نا شست کریر۔ حوال اٹی سرینگر اٹی جوڑ اسہ ریسرچ سیل انا حوالہ ءِ ترسا پاننگاکہ مقبوضہ جموں وکشمیر اٹی تعینات بھارتی فوجی تا کچ 15 لکھ اسہ ہزار نا لگ بھگ ءِ۔ بھارتی فوج انا ورناتا کچ 7 لکھ 50ہزار ، پیراملیٹری کارندہ غاتا کچ 5 لکھ 35 ہزار، پولیس کارندہ غاتا کچ 1 لکھ 30 ہزار، اسپیشل پولیس آفیسر آتا کچ 35 ہزار وخت اس کہ پنجا ہزار ولیج ڈیفنس کمیٹی ءُ، جم وڑاٹ دا کچ پانزدہ لکھ اسہ ہزار جوڑ مریک