خلاءِ پرامن مسخت آتیکن کاریم اٹ اتنگے، پاکستان

اقوام متحدہ۔ 27اکتوبر (اے پی پی) پاکستان خلا ءِ سلہہ غاتیان پاک تخنگ کن گام گیج کننگ نا خواست کرسا پارینے کہ خلا ءِ بیرہ پرامن مسخت و پٹ وپول کن بایدے کاریم اٹ اتنگے۔ اقوام متحدہ نا جنرل اسمبلی نا چارمیکو کمیٹی آن تران اٹی پارے کہ داہیت مایوس کن ءِ کہ گڑاس جنگ انا پڑ تکسا کرسا تعلقدار فوجی لائخی تے دوئی کننگ اٹی ءُ۔ اوپارے کہ پیشن نا  خلا ٹی سٹیلائٹ آتے میزائل اٹ شست کرسا بھس کننگ نا آزموندہ ہرافتا ملبہ تالان مننگ آن بیدس ہم چندی منفی اثرآک ءُ، گڑتی نا سوب ءُ۔ اوپارے کہ پاکستان مدام پیشن نا خلا ٹی سلہہ غاتا رُمب انا بناءِ کننگ نا پبی مخالفت ءِ کرینے۔ اوپارے کہ سلامتی نا پلوآن خلانا بابت ساڑی آکانود نا پنجر دابابت ودوک آ خطرہ غاتون مون تننگ نا اہلیت تخپک۔ اومستی پارے کہ جہانی برادری کیہی دہائی آن داہیت انا پیدواری ءِ کننگ ءِ کہ پیشن نا  خلا ٹی سلہہ غاتا رُمب انا بناءِ کننگ نا جاگہ غا اودے پرامن مسخت آتیکن کاریم اٹ اتنگ کن گام گیج کننگے۔ اوپارے کہ تینا بشخ انا وڑاٹ پاکستان اقوام متحدہ نا پنچ خلائی معاہدہ غاتے پک کرینے و تینا خلائی لائخی تے کشت وکشار، جان جوڑی، چاگڑدی بدلی تا منفی اثرآتیٹی کمتی و ڈیزاسٹر مینجمنٹ تون اوار ایلو گڑاتے گچین کننگ کن کاریم اٹ اتنگ ءِ۔ اوپارے کہ پاکستان چندی علاقائی و جہانی خلائی پٹ وپول و کمکاری نا تنظیم تا رکنیت تخک۔ اوپارے کہ پاکستان نا قومی خلائی ایجنسی سپارکو ٹی اقوام متحدہ نا پلیٹ فارم فارسپیس بیسڈ انفارمیشن فار ڈیزاسٹر مینجمنٹ اینڈ ایمرجنسی رسپانس نا دفتراس جوڑ کرینے۔ سپیس 2030 ایجنڈا نا اہمیت آ زور شاغسا پاکستانی مندوب پارے کہ پدتموک ملک آتے داسہ ہم کیہی ہمو اڑاند آتا مون تروک ءِ ہرا اوفتے پوسکن آ خلائی ٹیکنالوجی آن پورو وڑاٹ فائدہ ہرفنگ آن توننگ ءُ۔ اوپارے کہ خلا اسہ نزور ءُ وسیلہ اسے و اودے اسیجائی جہانی خیرخواہی کن کاریم اٹ بایدے اتنگے۔ اوپارے کہ خلائی ٹریفک نا بست وبند و خلائی ملبہ نا تخفیف خلا نا مریس مدتی پائیداری کن بھاز اہم ءِ۔