مچ آ دنیا ٹی رہینگوک آ کشمیریک اینو تہاردے اڈتننگ  ءُ، مسخت دنیا ءِ کلہو تننگ ءِ کہ بھارت جموں وکشمیر آ اوفتا است خواہی تا برخلاف کوزہ کرینے

سرینگر۔ 27 اکتوبر (اے پی پی) کنٹرول لائن نا ہڑتوم آ کنڈ و مچ آ دنیا ٹی رہینگوک آ کشمیریک اینو تہار دے اڈتننگ ءُ ہرانا مسخت دنیا ءِ دا پیدوار کلہو تننگ ءِ کہ بھارت جموں وکشمیر آ غیرکانودی وڑاٹ و کشمیری تا است خواہی تا برخلاف کوزہ کرینے۔ کشمیر میڈیا سروس نا رداٹ تہاردے اڈتننگ نا کال کل جماعتی حریت کانفرنس تسنے۔ 27 اکتوبر 1947 آ جموں وکشمیر آ بھارتی فوج انا جارحیت و نریندر مودی نا فسطائی بھارتی حکومت نا کنڈآن 5 اگست 2019 آ مقبوضہ کشمیر نا خصوصی حیثیت نا منسوخی نا مذمت کن اینو آزاد جموں و کشمیر ، پاکستان و مچ آ دنیا ٹی برانزی مارچ، ریلی و سیمینار اڈتننگ انگ ءِ۔ کل جماعتی حریت کانفرنس سرینگر اٹی اسہ بیان اسےٹی کشمیری تے پارینے کہ او اینو دنیا ءِ دا باور کرفر کہ جموںو کشمیر ءِ بھارت نا غلامی آن آجو کرفنگ اسکان اوآسرات تولپسہ۔ بیان اٹی پاننگانے کہ 27 اکتوبر جموں وکشمیر نا تاریخ نا اسہ تہار ءُ دے اسے۔ اوپارے کہ بھارتی جبر و استبداد کشمیری تا جوزہ آجوئی ءِ بدل کننگ کپک و او حق خودارادیت نا دوئی کننگ نا جہد پورو سرسہبی اسکان برجاتخرہ۔ بیان اٹی جہانی برادری آ ہم زور شاغنگاکہ او مقبوضہ جموں وکشمیر اٹی بھارتی ظلم آ مجرمانہ خاموشی ءِ اِلے و بھارت ءِ اقوام متحدہ نا سلامتی کونسل نا قرارداد آتا رداٹ کشمیری تے اوفتا حق خودارادیت تننگ آ بیوس کرفنگ کن عملی گام گیج کے۔ بھارت 27 اکتوبر 1947 آ تقسیم برصغیر نا ڈٹ انا پاش آن پاش خلاف ورزی کرسا سرینگر نا بالی پٹ آ فوج ءِ دڑفسا جموں وکشمیر آ غیرکانودی وڑاٹ کشمیری تا است خواہی تا برخلاف کوزہ کریسس۔