اکتوبر کشمیر نا تاریخ نا تہار انگا دے ءِ ، حریت راہشون

سرینگر۔ 27 اکتوبر (اے پی پی) بھارت نا غیرکانودی کوزہ ٹی جموں وکشمیراٹی کل جماعتی حریت کانفرنس نا راہشونک و تنظیمک پارینو کہ 27 اکتوبر جموں وکشمیر نا تاریخ نا تہار انگا دے ءِ انتئے کہ بھارت 1947 اٹی دادے آ تقسیم برصغیر نا اصول آتے لتاڑسا و کشمیری تا است خواہی تے پاما ل کرسا جموں وکشمیر آ کوزہ کریسس ۔ کشمیر میڈیا سروس نا رداٹ کل جماعتی حریت کانفرنس نا راہشون فردوس احمد شاہ ، زمرودہ حبیب، خادم حسین، سبط شبیر قمی، یاسمین راجہ، ڈاکٹر معصب ، مسلم لیگ جموں وکشمیر، پیپلز لیگ جموں وکشمیر ئسک تینا بیان تیٹی پارینو کہ جموں وکشمیر دنیا نا غٹ آن بھلا فوجی گھیڑ والا ڈیہہ جوڑ مسنے۔ اوفک پاریر کہ کشمیر نا جھیڑہ داتم اسکان ایسر مفننگ نا سوب آن کشمیریک بھاز مشکل آتا گواچی ءُ و ہندا ویل 2 جوہری لائخی تخوک ملک بھارت و پاکستان نا نیام اٹ بے چیٹی تا بنداوی سوب ءِ۔ اوفک پاریر کہ کشمیر نا ویل ایسر مفننگ نا سوب آن نئے بیرہ سویلی ایشیا بلکن مچ آ دنیا نا امن خطرہ ٹی ءِ۔ حریت راہشونک و تنظیمک پاریر کہ بھارتی ظلم کشمیری تا حق خودارادیت نا دوئی کننگ نا جہد ءِ نزور کننگ کپک و اوفک شہید آتا عظیم مشن ءِ ہر بہا آ ایسر اسکان سرکیرہ۔ کل جماعتی حریت کانفرنس آزاد جموں وکشمیر نا شاخ انا راہشونک سید فیض نقشبندی ، اعجاز رحمانی، شیخ یعقوب ، الطاف احمد بٹ، شمیم شال و منظور احمد شاہ ئسک پارینو کہ کشمیری الس 1947 آن بھارتی کوزہ غان آجوئی کن بے مٹ قربانی تننگ ءُ و تینا جہد ءِ برجا تخنگ کن سنبرینگوک ءُ۔ اوفک پاریر کہ بھارت نا غیر حقیقت پسندانہ طرز عمل و ضد کشمیر نا جھیڑہ نا ایسری ٹی بنداوی اڑاند ءِ۔