کشمیر نا ویل ءِ ایسر کننگ آن بیدس ڈیہہ ٹی امن مننگ کپک، ڈاکٹر ایچ آر ہلالی

پشاور۔ 27 اکتوبر (اے پی پی) پشاور یونیورسٹی نا شعبہ سیاسیات نا مسکوہی چیئرمین پروفیسر ڈاکٹر ایچ آ رہلالی پارینے کہ ایٹمی سلہہ غاتیان شُپ ہمسایہ ملک آتا نیام اٹ کشمیر آ چار جنگ کننگانے و اسہ پین جنگ اس مچ آ سویلی ایشیاکن بھسکار مننگ کیک، و اونا اثرآک ڈیہہ غان ہم مون آ ہِننگ کیرہ۔ اوپارے کہ برصغیر اٹی امن نا کسر کشمیرآن مرسا گدرینگک و ڈیہہ ٹی ہمووخت اسکان پائیدار امن و سوگوی مننگ کپک ہراتم اسکان دا بنداوی ویل انا کشمیری تا است خواہی نا رداٹ ایسر اس کشنگپک۔ پاکستان نا مسکوہی سفیر منظور الحق پارے کہ بھارت نا کنڈآن غیرکانودی وڑاٹ جموں وکشمیر آ جبری کوزہ جہانی کانود آتیان بیدس پاک بھارت تقسیم نا ڈٹ، اقوام متحدہ نا چارٹر و اقوام متحدہ ناسلامتی کونسل نا قرارداد (یواین ایس سی ) نا ہم خلاف ورزی ءِ۔ اوپارے کہ 75 سال انا جبری کوزہ غان پد ہم بھارت مقبوضہ دامان اٹی کشمیری تا روا تحریک آجوئی ءِ توننگ اٹ پورو وڑاٹ بے سہب مسنے، 5 اگست 2019 آ فاشٹ مودی حکومت نا اسہ کنڈی و غیرکانودی گام گیج آتیان پد جموں وکشمیر اٹی ہندی آجوئی نا تحریک فیصلہ کن ریسہ ٹی پترینگانے۔ اوپارے کہ دا غیرکانودی کارروائیک پن انا سیکولر ریاست نا اصل دروشم ءِ بے نقاب کرینو و دا پک کرینو کہ بھارت اٹی اقلیت آتیکن ہچ ءُ جاگہ اس اف ، ہموڑے مسلمان و کشمیری تے انسانی حق انا بھلا خلاف ورزی، عدالت آن ایڑتر خون و ریاستی دہشت گردی نا شست کننگ انگ ءِ۔