آجوئی مقبوضہ کشمیر نا الس نا بنداوی حق ءِ، نن آجوئی نا جہد اٹی کشمیری الس تون ہم کوپہ سلوک اُن، محمود خان

پشاور۔ 27 اکتوبر (اے پی پی) وزیراعلیٰ خیبرپختونخوا محمود خان پارینے کہ آجوئی مقبوضہ کشمیر نا الس نا بنداوی حق ءِ و نن آجوئی نا دا جہد اٹی کشمیری الس تون ہم کوپہ سلوک اُن۔ کشمیر تہاردے انا وخت آ جاری کلہواٹی کشمیری الس تون یکجہتی نا درشانیءِ کرسا اوپارے کہ 27 اکتوبر 1947 انسانی تاریخ نا اسہ تہار ءُ دے اس ئسک ہراتم بھارتی کوزہ گیر فورس کودک کشمیری تیا ظلم و ستم کننگ و جموں وکشمیر آ کوزہ کننگ کن سری نگر اٹ پترینگا و ہمودے آن اینو اسکان کشمیری تیا ظلم و جور انا چرجوئی سلنگ کتنے۔ اوپارے کہ آجوئی مقبوضہ کشمیر نا الس نا بنداوی حق ءِ و نن آجوئی نا دا جہد اٹی کشمیری الس تون ہم کوپہ سلوک اُن۔ اوانسانی حق انا جہانی ادارہ غاتیا زور شاغسا پارے کہ اوفک کشمیری الس آ بھارتی ظلم و ستم نا نوٹس ءِ ہلیر و کشمیری الس ءِ اوفتا حق خودارادیت ترفنگ نا چرجوئی ٹی اقوام متحدہ نا قرارداد آتیا عملدرآمد ءِ پک کننگ اٹ تینا کڑد ءِ ادا کیر۔ اوپارے کہ ڈیہہ نا امن کشمیر نا ویل انا ایسری تون گنڈوک ءِ، داڑان بیدس ڈیہہ ٹی امن مننگ کپک۔ وزیراعلیٰ مقبوضہ کشمیر نا الس نا اخلاقی ، سفارتی و سیاسی کہول آ مخ تفی ءِ برجاتخنگ نا عزم انا درشانی ءِ کرسا پارے کہ ہراوڑ مقبوضہ کشمیر نا مظلوم الس اسہ بھلو وخت اسے آن آجوئی کن جنگ تننگ ءُ اونا مچ آ دنیا ٹی درور ملیپک۔ اوپارے کہ انشاء اللہ اوفتا جہد ضرور سرسہب مریک و کشمیری ایلمک امن و شونہالی اٹ اسہ پوسکن ءُ و آجو زند اسے نا سفرنا زوت بناءِ کیرہ۔ اوپارے کہ تینے دنیا نا غٹ آن بھلا جمہوریت پاروک آ بھارت تدوک آ 7 دہائی آن کشمیری الس آ ہرا ظلم و ستم ءِ کننگ ءِ اومذمت نا قابل ءِ۔ اوپارے کہ کشمیری تا جہد آجوئی ءِ توننگ کن بھارت ہڑدے پوسکن ءُ چم کننگ ءِ۔ تدوک آ 3 سال آن ہراوڑ اسہ کنڈی و غیرکانودی گام تا کمک اٹ بھارت کشمیری الس ءِ گھیڑ کرینے او مچ آ جہانی برادری خاص وڑاٹ اقوام متحدہ و انسانی حق انا ایلو ادارہ غاتیکن لمحہ فکریہ اسے۔ اوانسانی حق انا جہانی ادارہ غاتیا زور شاغانے کہ اوفک کشمیری الس ءِ تینا آخبت نا فیصلہ ءِ کننگ نا حق ایتر و دا چرجوئی ٹی اقوام متحدہ نا قرارداد  آتیا من و عن عملدرآمد ءِ پک کننگے۔