دنیا نا اسہ طاقت اس ہم کشمیر کاز ءِ توننگ کپک، دا سفر کشمیرنا آجوئی آ چٹک، بنجائی وزیر حوالکاری مریم اورنگزیب

اسلام آباد۔ 27 اکتوبر (اے پی پی ) بنجائی وزیر حوالکاری و شینکاری مریم اورنگزیب کشمیر تہاردے انا وخت آ کشمیری الس تون یکجہتی نا درشانی ءِ کرسا پارینے کہ دنیا نا اسہ طاقت اس ہم کشمیر کاز ءِ توننگ کپک، دا سفر کشمیر نا آجوئی آ چٹک۔ پنچ شنبےنادے آ کشمیر تہار دے انا وخت آ تینا کلہو اٹی بنجائی وزیر حوالکاری پارے کہ 75 سال مست اینو نادے بھارتی فورس غیرکانودی وڑاٹ مقبوضہ جموں وکشمیر آ کوزہ کریسس ہراڑے داسہ ہر دہ کشمیری تیا اسہ بھارتی فوجی اس مسلط ءِ۔ اوپارے کہ پاکستان ہفت دہائی آن برجا کشمیری الس نا آجوئی نا سفر اٹی سوگوءُ دیوال اسے آنبار اوفتے تون سلوک ءِ۔ اوپارے کہ جہد آجوئی ٹی ہراوڑکشمیریک قربانی تسر، اونا درور ملنگ مشکل ءِ۔ بنجائی وزیر حوالکاری پارے کہ کشمیریک پک کرینو کہ بھارت زور انا وحشیانہ کاریم اٹ اتنگ آن اوفتا جوزہ حریت ءِ نزور کننگ کپک۔ پاکستان کشمیری الس نا سیاسی، سفارتی و اخلاقی مخ تفی ءِ برجاتخک۔ اوجہانی برادری آ زور شاغا کہ او مقبوضہ کشمیر اٹی کودک کشمیری تا برخلاف انسانی حق انا خلاف ورزی تا نوٹس ءِ ہلے۔