اقوام متحدہ کشمیر نا ویل ءِ ایسر کننگ کن تینا کڑد ءِ اداکے، وزیر مملکت حنا ربانی کھر نا دفترخارجہ ٹی تہاردے انا دود آن تران

اسلام آباد۔ 27 اکتوبر (اے پی پی) جموں وکشمیر آ بھارت نا غیرکانودی کوزہ نا برخلاف تہاردے انا وخت آ بنجائی دارالحکومت اسلام آباد اٹی دفترخارجہ ٹی کشمیری الس تون یکجہتی نا درشانی ءِ کننگ کن اسہ دود اس اڈ ہلک وخت اس کہ اسہ ریلی اس ہم کشنگا ہراٹی وزیر مملکت امور خارجہ حنا ربانی کھر، وزارت خارجہ نا آفیسر آک و عملہ نا باسک آک بشخ ہلکر۔ داوخت آ دود آن تران کرسا وزیر مملکت امور خارجہ حنا ربانی کھر پارے کہ اقوام متحدہ کشمیر نا ویل ءِ ایسر کننگ کن تینا کڑد ءِ ادا کے، کشمیری الس 75 سال آن بھارتی جور و ظلم ءِ سگنگ ءُ، پاکستان کشمیری الس تون سلوک ءِ و سلک۔ اوپارے کہ 27 اکتوبر 1947 آن بناکروک آ ظلم اینو ہم برجاءِ، بھارت مقبوضہ کشمیر اٹی مخلوق ءِ عدالت آن ایڑتر کسفنگ ءِ۔ حنا ربانی کھر پارے کہ بھارت علاقہ ٹی آبادی نا کچ ءِ بدل کننگ کن غیر کانودی ڈومیسائل جاری کننگ ءِ۔ اوپارے کہ بھارت 27 اکتوبر 1947 آ سری نگر اٹی تینا فوجی تے دڑفسا کشمیر آ غیرکانودی کوزہ کرے۔ دود اٹی کشمیر نا بارواٹ نغمہ” میرے وطن” ءِ ہم جاری کننگا، دود اٹی کشمیری الس کن دعاہم کننگا۔ اوکان پد تہاردے انا وخت آ دفترخارجہ غان ریلی بناکرے ہراٹی بشخ ہلوک آک پارلیمنٹ ہاوس نا کسر ڈی چوک اسکان ہنار ہراڑے سہب انا دہ بجہ غا سائرن خلنگا۔ تہاردے انا وخت آ دفترخارجہ غان اسہ ریلی اس کشنگ نا مسخت مقبوضہ کشمیر نا الس تون یکجہتی نا درشانی ءِ کننگ ئسک۔ وزیر مملکت امور خارجہ حنا ربانی کھر ہم ریلی ٹی بشخ ہلک، ریلی ٹی کشمیری راہشون و ایلو حکومتی شخصیت آک ہم بشخ ہلکر۔ داہیت ذکر انا قابل ءِ کہ 27 اکتوبر نا دے ءِ ہرسال تہاردے انا وڑاٹ اڈتننگک۔ 1947 اٹی ہندادے آ بھارت جموں وکشمیر آ غیرکانودی وڑاٹ زوراکی اٹ فوجی طاقت اٹ کوزہ کریسس۔ ریلی ٹی بشخ ہلوک آتیان تران کرسا حریت کانفرنس نا آزاد کشمیر شاخ نا کنوینر محمود احمد ساغر و ایلو ترانکار آک پاریر کہ بھارت کشمیری تا آجوئی نا است خواہی و حق خودارادیت نا جہد ءِ زیات وخت اسکان توننگ کپک۔ اوفک کشمیری الس ءِ زبردست خراج تحسین پیش کرسا پاریر کہ پاکستان کشمیری تا انصاف اٹ جہد اٹی اوفتے تون ہم کوپہ سلوک ءِ۔ اوفک پاریر کہ کشمیری الس تدوک آ 75 سال اٹی بھارتی کوزہ گیر فوج انا مقابلہ ءِ بھاز دلیری اٹ پبی وڑاٹ کرینے، کشمیری تا جہد آجوئی ٹی داتم اسکان لکھ ٓ شہید آک تینا جان تا قربانی ءِ تسنو۔ اوفک جہانی برادری ءِ پاریر کہ او بھارت نا غیرکانودی کوزہ گیری ٹی جموں وکشمیر اٹی ریاستی دہشت گردی و انسانی حق انا خلاف ورزی تیان چشم پوشی کپ۔ اوفک پاریر کہ بھارت کشمیری تا آجوئی نا جہد ءِ زیات ہرے اسکان توننگ کپک۔