پاکستان نا الس کشمیری تا جہد اٹی اوفتے تون ہم کوپہ سلوک ءِ ، وزیراعظم شہباز شریف نا ٹویٹ

اسلام آباد۔ 27 اکتوبر (اے پی پی) وزیراعظم شہباز شریف پارینے کہ پاکستان نا الس کشمیری تا جہد اٹی اوفتے تون ہم کوپہ سلوک ءِ ، دنیا بھارت نا غیرکانودی کوزہ گیری ٹی جموں و کشمیر اٹی انسانی حق انا خلاف ورزی تیا بایدے خن تے ترکپ۔ پنچ شنبےنادے آ اسہ ٹویٹ اسے ٹی وزیراعظم پارے کہ 27 اکتوبر نادے ءِ تہار دے انا وڑاٹ اڈتننگک۔ 1947 اٹی دادے آ بھارت جموں وکشمیر آ غیرکانودی ، غیر اخلاقی و زوراکی اٹ کوزہ کریسس۔ دا دے کشمیری تا بے مٹ حوصلہ و جیرت مندی نا شاہدی اسے ہرا اوفک تدوک آ 75 سال اٹی بھارتی کوزہ گیر فوج انا سخت مقابلہءِ کرسا نشان تسنو۔ اوپارے کہ اینو پاکستانی الس کشمیری تے زبردست خراج تحسین پیش کیک و اوفتا انصاف اٹ جہد اٹی اوفتے تون ہم کوپہ سلنگ نا عزم کیک۔ دنیا بھارت نا غیرکانودی کوزہ گیری ٹی جموں وکشمیر اٹی بھارت نا کنڈآن انسانی حق انا خلاف ورزی تیا بایدے خن تے ترکپ، ہراکہ اسہ بھاز بھلوفوجی علاقہ اس جوڑ مسنے۔ اوپارے کہ کشمیری الس نا آجوئی نا است خواہی ءِ زیات ہرے اسکان توننگ مفک۔