جموں وکشمیرآ بھارت نا پدریسہ غیر کانودی کوزہ غان ڈیہہ ٹی امن و سوگوی ءِ بھاز خطرہ مون تروک ءِ، حریت سرکڑدہ غاک

سرینگر۔ 26 اکتوبر (اے پی پی) بھارت نا غیر کانودی کوزہ گیری ٹی جموںو کشمیر اٹی کل جماعتی حریت کانفرنس نا راہشونک پارینو کہ جموں وکشمیر آ بھارت نا پدریسہ غیرکانودی کوزہ غان ڈیہہ ٹی امن و سوگوی ءِ بھاز خطرہ مون تروک ءِ۔ کشمیر میڈیا سروس نا رداٹ کل جماعتی حریت کانفرنس نا راہشونک کشمیری تیا زور شاغار کہ او 27 اکتوبر ءِ تہاردے انا وڑاٹ اڈ ایتر تانکہ بھار ت و جہانی برادری ءِ دا پیدوار کلہو تننگ مرے کہ کشمیریک تینا وطن آ بھارت نا غیرکانودی کوزہ ءِ مسترد کیرہ و او بھارتی کوزہ نا چٹفنگ و حق خودارادیت نا دوئی کننگ اسکان تینا جہد ءِ برجاتخرہ۔ کل جماعتی حریت کانفرنس نا سینئر راہشون شبیر احمد شاہ نئی دہلی نا تہاڑ زندان آن اسہ کلہو اسے ٹی پارے کہ 27 اکتوبر 1947 آ بھارت نا کنڈآن جموں و کشمیر آ جلہو اسہ لوچ ءُ جارحیت اس ئسک۔ اواودے کشمیری تا سیاسی و جمہوری حق آ اسہ ظالمانہ جلہو اس گوندسا پارے کہ دا منحوس دے پن انا جمہوری ریاست کشمیری الس نا بنداوی حق ءِ سلب کرسا جہانی کانود نا ڈھیٹی اٹ خلاف ورزی ءِ کرینے۔ اوپارے کہ ظالم بھارت نا دوتے اٹ مصیبت آتے سہینگ آن پد ہم کشمیر نا نرزور الس ڈیہہ آ اونا کوزہ ءِ اسُل امنا کتنو و بھارتی بالادستی ءِ یکسر مسترد کرینو۔ شبیر احمد شاہ مستی پارے کہ ہمودے مر اف ہراتم کشمیری تا جہد و عظیم مسخت کن اوفتا قربانیک رنگ اس اتیرہ۔ اوجہانی برادری آ زور شاغا کہ او جموں وکشمیر آ بھارت نا کوزہ ءِ چٹفنگ کن گچین کڑد ادا کے۔ کل جماعتی حریت کانفرنس نا راہشونک سید بشیر اندرابی و خواجہ فردوس ئسک سرینگر اٹی جاری اسہ اسیجائی بیان اسے ٹی پاریر کہ بھارت 27 اکتوبر 1947 آ طاقت و درواٹ جموں و کشمیر آ غیرکانودی کوزہ کننگ آن پد آن کشمیری تا نسل کشی ءِ کننگ ءِ۔ اوفک پاریر کہ کشمیریک پگہ تہار دے اڈایترہ و بھارت و جہانی برادری آ پیدوار کیرہ کہ او بھارت نا جبری کوزہ ءِ امنا کپسہ و بھارتی غلامی آن نجات اسکان تینا پرامن جہد ءِ برجاتخرہ۔ کل جماعتی حریت کانفرنس نا راہشون انجینئر ہلال احمد وار سرینگر اٹی تینا بیان اٹی 27 اکتوبر 1947 آ جموں وکشمیر آ جلہو ءِ بھارتی جمہوریت نا دروشم آ اسہ مون ءُ داغ اس گوندا۔ او ایسر نا چاری کشمیر نا جھیڑہ ءِ اقوام متحدہ نا ساکھ، مسخت و وجود آ اسہ بھلو سوج انا نشان اس گوندا۔ کل جماعتی حریت کانفرنس نا راہشون محمد یوسف نقاش سری نگر اٹی اسہ بیان اسے ٹی پارے کہ 27 اکتوبر 1947 کشمیر نا تاریخ نا تہار انگا دے ءِ۔ اوپارے کہ بھارت نا ظالمانہ و سفاکانہ چم آک کشمیری تے اوفتا ناقابل تنسیخ حق ،حق خودارادیت نا دوئی کننگ آن توننگ کپسہ۔ او مقبوضہ جموں وکشمیر نا مخلوق آن خواست کرے کہ او کل جماعتی حریت کانفرنس نا کنڈآن 27 اکتوبر آ تروک آ ہڑتال نا کال ءِ پبی وڑاٹ سرسہب کیر۔ جموں وکشمیر لبریشن فرنٹ و جموں وکشمیر اسلامی تنظیم آجوئی ہم تینا بیان تیٹی کشمیری تیان 27 اکتوبر ءِ تہاردے انا وڑاٹ اڈتننگ نا خواست کرینو۔