ارشد شریف نا کینیا ٹی خون نا بابت راستکی تے ہُننگ کن بڑزکو کہولی جاست وپاستی ٹیم اس جوڑ کرینن، وزیرداخلہ

اسلام آباد۔ 26 اکتوبر (اے پی پی) بنجائی وزیر داخلہ رانا ثناء اللہ خان پارینے کہ سینئر صحافی ارشد شریف نا کینیا ٹی خون نا بابت راستکی تے ہُننگ کن مسہ باسکی بڑزکو کہولی جاست وپاستی ٹیم اس جوڑ کرینن، جاست وپاستی ٹیم ایف آئی اے و انٹیلی ایجنسی تا بڑزکو آفیسر آتیا تالان ءِ، جاست وپاستی ٹیم دمدستی وڑاٹ کینیا غا روانہ مریک و ارشد شریف خون کیس انا جاست وپاست ءِ کیک، جاست وپاستی ٹیم گڈیکو رپورٹ ءِ وزارت داخلہ ءِ پیش کیک۔ چارشنبےنادے آ تینا بیان اٹی وزیرداخلہ رانا ثناء اللہ خان پارے کہ جاست وپاستی ٹیم ارشد شریف کیس اٹی پاکستان نا اسہ نجی چینل اسے تون منسلک شخصیت نا کینیا ٹی خیسن نا سمگلنگ نا کاروبار نا بابت جوڑ کمپنی نا کڑد انا جاچ ءِ ہلیک۔ جاست وپاستی ٹیم ارشد شریف نا پاکستان آن دبئی و ولدا دبئی آن کینیا روانگی نا پورو سوب آتا جاچ ءِ ہلیک۔ اسہ سیاسی شخصیت اس اعتراف آن پد، جاست وپاستی ٹیم ارشد شریف ءِ پاکستان آن دبئی و ولدا آن کینیا غا ہِننگ آ بیوس کننگ نا سوب آتا ہم جاچ ءِ ہلیک۔ جاست وپاستی ٹیم ، کینیا پولیس و ایلو ذریعہ غاتے اٹ دوئی مروک معلومداری و شاہدی تے  مون آ تخسا آجو رپورٹ اس مرتب کرسا وزارت داخلہءِ پیش کیک۔ وزارت داخلہ آن جاری نوٹیفکیشن نا رداٹ جاست وپاستی ٹیم ڈائریکٹر ایف آئی اے عطروحید، آئی بی نا ڈپٹی ڈائریکٹر عمرشاہد حمیدئسک اوار ءُ۔ دا جاست وپاستی ٹیم دمدستی وڑاٹ کینیا نا دورہ ءِ کیک، وزارت داخلہ و کینیا ٹی پاکستانی سفارت خانہ ٹیم انا کمک ءِ کیک۔