بھارت نا غیر کانودی کوزہ ٹی جموں وکشمیر اٹی علاقائی سیاسی راہشون تا  کل جماعتی حریت کانفرنس نا سینئر راہشون مولانا عباس انصاری نا کزیت آ ڈکھ و غم نا درشان

سرینگر۔ 26 اکتوبر (اے پی پی) بھارت نا غیرکانودی کوزہ گیری ٹی جموںو کشمیر اٹی کل جماعتی حریت کانفرنس نا راہشونک سینئر حریت راہشون مولانا عباس انصاری ءِ شاندار خراج عقیدت پیش کرینو  ہرا تدوک آ دے سری نگر اٹی کزیت کریسس۔ کشمیر میڈیا سروس نا رداٹ غیرکانودی وڑاٹ نظر بند سینئر حریت راہشون غلام احمد گلزار سری نگر نا سینٹرل زندان آن اسہ کلہو اسے ٹی مولانا عباس انصاری نا کزیت آ است ہسونی نا درشانی ءِ کرے و اودے کشمیر نا برجا تحریک آجوئی کن بے بدل نسخان اس گوندا۔ اوپارے کہ کشمیر کاز اکن ایماندار نا خذمت آتے مدام یات تخنگک۔ غلام احمد گلزار پارے کہ مولانا عباس انصاری اسہ مرہروک ءُ راہشون اس ئسک ہرا تینا مچ آ زند ءِ انسانیت کن وقف کرے و مظلوم کشمیری الس نا سیاسی ، راجی و مذہبی حق اکن جہد کرسا کرے۔ اونا پاننگ ئس کہ مولانا عباس انصاری کل جماعتی حریت کانفرنس نا چیئرمین نا وڑاٹ کشمیری تا است خواہی و اقوام متحدہ نا تعلقدار قرارداد آتا رداٹ کشمیر نا ویل انا ایسری کن ہرممکن کوشست کرے۔ اودے کشمیر نا مقدمہ تون مون تننگ نا پاداش اٹی دزگیر کرسا زندان اٹ شاغنگا ولے او ثابت قدم سلیس و بھارتی جور انا مون  آ وخت اس ہم تینے شیف توتہو۔ کل جماعتی حریت کانفرنس نا راہشونک خادم حسین و سید سبط شبیر قمی ئسک سرینگر اٹی جاری اسہ اسیجائی بیان اسے ٹی پاریر کہ مولانا عباس انصاری نا کزیت آن کشمیری تحریک آجوئی نا اسہ بے لوث راہشون اسے تون اوار اوار اسہ عظیم ءُ عالم دین اسے آن ہم محروم مس۔ اوفک پاریر کہ ایماندار نا کشمیر کاز و کشمیری راج اکن خذمت آتے مدام یات تخنگک۔ اوفک پدسلوک خاہوت تون ہڑزخواہی نا درشانی ءِ کریر و ایماندار نا روح انا دعا کریر۔ داکان بیدس کل جماعتی حریت کانفرنس آزاد جموں وکشمیر شاخ انا راہشونک محمد سلطان بٹ و مشتاق احمد بٹ ئسک اسلام آباد اٹی جاری  تینا بیان تیٹی مولانا عباس انصاری نا کزیت آ است ہسونی نا درشانی ءِکرسا پاریر کہ او امن پسند ءُ بندغ اس ئسک و پاکستان، بھارت و حقی کشمیری سرکڑدہ غاتا نیام اٹ بامعنی و بھرمی مذاکرات نا کمک اٹ کشمیر ناجھیڑہ نا پرامن ایسری آ یخین تخاکہ۔