دیر انا بشخنگ نا سندھ طاس معاہدہ نا شرف و اوڑا عملدرآمد کننگے، سفیر منیر اکرم

اقوام متحدہ۔ 26 اکتوبر (اے پی پی) اقوام متحدہ ٹی پاکستان ناآخبتی مندوب سفیر منیر اکرم بھارت و پاکستان نا نیام اٹ 1960 نا سندھ طاس معاہدہ نا شرف و اوڑا عملدرآمد نا گرج آ زور شاغانے۔ کشمیر میڈیا سروس نا رداٹ منیر اکرم اقوام متحدہ نا آبی کانفرنس 2023 نا تیاری نا دیوان آن تران کرسا پارے کہ سیم انا ایلو کنڈا بدلی تا براہ راست اثر پاکستان آ تمک ہنداخاطران دا المی ءِ دیر انا بشخنگ نا سندھ طاس معاہدہ نا شرف ءِ کننگے و اوڑا عملدرآمد کننگے۔ اوپارے کہ پاکستان دنیا ٹی دیر انا کمتی نا 10 سرفہرست ملک آتیٹی اوار ءِ و آب و ہوا نا خطرہ غان دوچار ٹاپ 10 ملک آتیٹی ہم اوار ءِ۔ منیر اکرم پارے کہ موسمی واقعہ کون آ نوکاپ، خشک سالی، برفانی جھیل آتا ترخنگ، طوفان و باسنی نا پدریسہ ریسہ غاک زند و ملکیت ہڑتوم آتے نسخان تسنو و پاکستان نا اقتصادی شونداری ءِ بھاز بے وڑ زہمی کرینو۔ پاکستانی سفیر پارے کہ پاکستان 2023 نا آبی کانفرنس نا سرحال آتا متفق ءِ ہرا اونا قومی اولیت آتون ہم گرنچ ءُ۔ یات سلے کہ کم و ود دُوانزدہ سد سائنسدان ، نجی بشخ انا نمائندہ و سول سوسائٹی نا باسک آک نیویارک اٹی اقوام متحدہ نا ہیڈکوارٹر اٹی دیوان کننگ ءُ تانکہ دیر و پائیداری نا بابت خیال آتا درشانی ءِ کننگ مرے۔