وزیراعظم شہباز شریف یکم نومبر آن چین نااِرادے ئی دورہ ءِ کیک، ترجمان دفترخارجہ

اسلام آباد۔ 26 اکتوبر (اے پی پی) وزیراعظم محمد شہباز شریف یکم نومبر آن چین نا اِرادے ئی دورہ ءِ کیک ، وزیر خارجہ بلاول بھٹو زرداری تون اوار بڑزکو کہول انا ڈل ہم اوڑتون اوار مریک، وزیراعظم ءِ دا دورہ نا سلہ ءِ عوامی جمہوریہ چین نا ریاستی کونسل نا وزیراعظم لی کی چیانگ خلکنے۔ دفترخارجہ نا ترجمان نا کنڈآن چارشنبے نادے آ جاری بیان نا رداٹ دا سال اپریل اٹی وزارت عظمیٰ نا عہدہ ءِ سنبھالنگ آن پد وزیراعظم محمد شہباز شریف نا چین نا اولیکو دورہ مریک۔ وزیراعظم 16 ستمبر 2022 آ ازبکستان اٹی چین نا صدر شی جن پنگ تون اوڑدہی کریسس۔ چین نا کمیونسٹ پارٹی نا تاریخی 20 می نیشنل کانگریس نا دیوان آن پد وزیراعظم چین نا دورہ ءِ کروک آ اولین راہشون تیٹی اوار ءِ۔ بیان نا رداٹ وزیراعظم نا دورہ پاکستان و چین نا نیام اٹ سرکڑدہ غاتا کہول آ ہن  و بر نا چرجوئی نا درشانی ءِ۔ وزیراعظم دورہ ٹی صدر شی جن پنگ تون اوڑدہی کیک و وزیراعظم لی کی چیانگ تون ڈل انا کہول آ گپ وتران کیک۔ وزیراعظم محمد شہباز شریف نا دورہ ٹی فریق آک تین پہ تینی اسٹریٹجک کمکاری نا شریداری نا جاچ ءِ ہلیرہ و علاقائی و جہانی پیش رفت آ خیال آتا درشانی ءِ کیرہ۔ بیان اٹی مستی پاننگانے کہ دا دورہ ٹی چندی بشخ آتیٹی مفاہمت نا چندی یات داشت /معاہدہ غاتیا دستخط گمانی ءِ وخت اس کہ بھلو کچ اسے آ ہڑتوم آ کنڈآتا کمکاری ناایجنڈا ءِ مون آ دننگ و سی پیک جوائنٹ کوآپریشن کمیٹی نا 27 اکتوبر آ مروک آ 11 می دیوان نا رداٹ سی پیک کمکاری نا رفتار ءِ سوگو کننگ نا ہم گمان ءِ۔