دیر پائین اٹی تہاردے مقبوضہ جموںو کشمیر نا بابت سرکاری رپورٹ

دیر لوئر۔ 26 اکتوبر (اے پی پی) ضلعی انتظامیہ دیرپائین 27 اکتوبر تہاردے مقبوضہ جموں و کشمیر نا بابت اسہ رپورٹ اس جاری کرینے ہراٹی او پارینے کہ 27، اکتوبر 1947 ساڑی آ صدی ٹی انسانی تاریخ نا تہار انگا دے ءِ، دادے بھارت مقبوضہ جموں وکشمیر اٹی انسانی حق انا خلاف ورزی تا تاریخ اس نوشتہ کرے  دا ہمودے ءِ ہراتم بھارت سری نگر اٹی تینا فوج ءِ شیف کریسس۔ پاکستان نا الحاق کن کشمیری تا جہد اٹی، مچ آ کشمیر اٹی پنچ لکھ آن زیات بندغ شہید مسر۔ مقبوضہ جموں وکشمیر ظلم انا اسہ خوفناک ءُ منظر اس جوڑ مسنے، ہراڑے بھارتی فوج انا چندی بٹالین تعینات ءُ ہرافتا کل کچ 9.5 لکھ آن زیات ءِ، ہرا انسانی حق انا بھلا خلاف ورزی تیٹی اوار ءُ۔ دا کچ انا مطلب ءِ کہ ہر 10 کشمیری تیکن اوسطا اسہ فوجی اس تعینات ءِ۔ مقبوضہ دامان داوخت آ دنیا نا غٹ آن زیات عسکری زدہ ڈیہہ ءِ و کوزہ گیر فوج ظلم و بربریت نا ہند ن ءُ داستان اس نوشتہ کننگ ءِ کہ وادی ٹی مش انا اسہ ٹکر اس ہم ہندن ءُ اف ہراٹی شہید آتا دتر اوار مف۔ دا ظلم آتیان بیدس بھارت کیہی مون آ کانود نافذعمل کرینے ہرافتا کمک اٹ او کشمیری تا آجوئی نا جہد ءِ لتاڑنگ خواہک، دُن کہ، آرمڈ فورسز اسپیشل پاورز ایکٹ، 1958 نا رداٹ، سیکورٹی فورس آتے مچی کروک آتے لتاڑنگ و تحریک آجوئی ءِ توننگ کن تینا اختیار اٹی ہروڑ ءِ کاریم اٹ اتنگ نا پورو اختیار دوئی ءِ۔ داوڑکرسا، اوفتا برخلاف ہچ ءُ کارروائی اس کننگ مفک، چائے اونا انسانی حق انا خلاف ورزی اخس کہ بھلن مرے۔ داکانود 1990 ٹی مقبوضہ جموں و کشمیر اٹی نافذ کننگاسس دلچسپ ہیت دادے کہ داوڑنا موقف اختیار کرسا بھارت انسانی حق انا جہانی تنظیم  دُن کہ ایمنسٹی انٹرنیشنل و ہیومن رائٹس واچ ءِ ہم مقبوضہ جموں و کشمیر نا دورہ ءِ کننگ و ہموجاگہ نا حالیت آتا مشاہدہ کننگ نا موکل تفک۔ بھارت نا دا روایہ پیدوار وڑاٹ ظاہر کیک کہ مقبوضہ جموں وکشمیر اٹی ظلم انا بھاز انگا داستانک ءُ، بھارت اسہ ہم مبصر اسے مقبوضہ جموں و کشمیر آ ہِننگ نا موکل تفک کہ دُن مف کہ او واقعہ غاتیان پڑدہ ءِ ہرفے و اونا دروغ انا دعویٰ پاش مرے۔ جہانی برادری، انسانی حق اکن کاریم کروک آ جہانی تنظیم تا فرض ءِ کہ او مقبوضہ جموں و کشمیر اٹی انسانی حق انا بھلا خلاف ورزی تا دمدستی نوٹس ءِ ہلیر و بھارت ءِ کشمیری تے اوفتا پیدائشی حق خودارادیت تننگ آ بیوس کیر۔ پاکستانی الس و حکومت ہر فورم آ کشمیری تیکن توار بڑز کیر ہ و اوفتا جہد آجوئی ءِ سفارتی کہول آ سپورٹ کیرہ۔