وزیراعظم محمد شہباز شریف نا سعودی عرب نا ولی عہد شہزادہ محمد بن سلمان تون اوڑدہی، ہڑتوم آ کنڈآتا تعلقداری تا غٹ پلو آتا جاچ ءِ ہلنگا، پاکستان و سعودی عرب نا نیام اٹ برادرانہ تعلقداری تے پین سوگو کننگ نا عزم انا درشان

ریاض۔ 26 اکتوبر (اے پی پی) وزیراعظم محمد شہباز شریف سعودی عرب نا ولی عہد شہزادہ محمد بن سلمان تون اوڑدہی کرے، ہڑتوم آ کنڈآتا تعلقداری تا غٹ پلو آتا جاچ و پاکستان و سعودی عرب نا نیام اٹ برادرانہ تعلقداری تے پین سوگو کننگ نا عزم انا درشانی ءِ کننگا۔ وزیراعظم آفس نا میڈیا ونگ آن جاری پریس ریلیز نا رداٹ وزیراعظم محمد شہباز شریف سعودی عرب نا ولی عہد شہزادہ محمد بن سلمان نا سلہ غا 25 اکتوبر 2022 آ سعودی عرب نا دورہ ءِ کرے۔ وزیراعظم ولی عہد شہزادہ، عزت مآب محمد بن سلمان تون تینا ڈل انا باسک آتون اوار ہڑتوم آ کنڈآتا اوڑدہی کرے۔ اوپاکستان اٹی ساڑی آ بھسکار نوکاپ اٹی امداد فراوان کننگ، خاص وڑاٹ، پاکستان اٹی نوکاپ آن زہمی علاقہ غاتیٹی کمکی گڑاتا فراوانی کن ریاض و اسلام آباد نا نیام اٹ خصوصی جہاز آتیا سعودی عرب نا سرکڑدہ غاتا منت واری ءِ ہرفے۔ وزیراعظم فیوچر انویسٹمنٹ انیشیٹو (ایف آئی آئی) کانفرنس نا سرسہب اڈتننگ آولی عہد ءِ مبارکبادی تس۔ اوجہانی راہشون و مچ آ دنیا غان کاروباری برادری ءِ یکجا کننگ کن ایف آئی آئی نا اہمیت ءِ اسہ اہم ءُ گام اسے نا وڑاٹ تالان کرے۔ ہڑتوم آ راہشونک ہڑتوم آ کنڈآتا تعلقداری نا غٹ پلو آتا جاچ ءِ ہلکر و پاکستان و سعودی عرب نا نیام اٹ برادرانہ تعلقداری تے پین سوگو کننگ نا عزم انا درشانی ءِ کریر۔ ولی عہد داہیت انا درشانی ءِ کرے کہ سعودی پاکستان تعلقداری ہڑتوم آ ملک، ڈیہہ و دنیا کن اہم ءِ۔ داکان مہالو دے انا وخت وزیراعظم ایف آئی آئی کانفرنس آن ہم تران کرے۔ تینا تقریر اٹی او داہیت آ زور شاغا کہ اونا حکومت ٹیکنالوجی نا دنیا ٹی بدلی کن پاکستانی ورناتا بشخ ہلنگ ءِ المی کننگ ءِ۔ اوجہانی برادری ءِ پاکستان نا تربیت یافتہ آئی ٹی پروفیشنلز آتیان فائدہ ہرفنگ نا سلہ خلک۔ دامسخت کن او پاکستان آ بروک آ غٹ زرکار آتے آسراتی فراوان کننگ کن تینا حکومت نا پکا عزم آ زور شاغا۔