کشمیریک پگہ بھارت نا غیر کانودی کوزہ نا برخلاف تہاردے اڈایترہ

اسلام آباد۔ 26اکتوبر (اے پی پی) لائن آف کنٹرول نا ہڑتوم آ کنڈ و مچ آ دنیا ٹی رہینگوک آ کشمیریک (پگہ) پنچ شنبےنادے آ جموںو کشمیر آ بھارت نا غیرکانودی کوزہ نا برخلاف تہاردے اڈایترہ و دنیا ءِ دا پیدوار کلہو اس ایترہ کہ او جموںو کشمیر آ بھارت نا غیرکانودی کوزہ ءِ اسُل امنا کپسہ، داوخت آ پاکستان اٹی ہم چندی دودآتے اڈتننگک۔ کل جماعتی حریت کانفرنس نا اپیل آ بھارت نا غیرکانودی کوزہ ٹی جموںو کشمیر اٹی 27 اکتوبر آ ہڑتال کننگک و کشمیری الس داہیت انا اسہ وار ولدا درشانی ءِ کیک کہ او بھارت نا غلامی آن آجوئی اسکان تینا جہد ءِ برجاتخرہ۔ حریت کانفرنس بھارت نا غیرکانودی کوزہ ٹی جموںوکشمیر اٹی ہڑتال نا کال تننگ آن بیدس پاکستان، آزاد جموں و کشمیر تون اوار پیشن نا ملک رہینگوک آکشمیری و پاکستانی تیا زور شاغانے کہ او بھارت نا غیرکانودی کوزہ ٹی جموں و کشمیر اٹی بھارتی ریاستی دہشت گردی نا کنڈا جہانی برادری نا چکار ءِ کرفنگ کن مچ آ دنیا ٹی بھارتی سفارت خانہ، اقوام متحدہ نا دفتر، تاریخی ہند و چندی دارالحکومت آتیٹی برانزی مچی اس کیر۔ 27 اکتوبر ءِ مچ آ دنیا ٹی تہاردے انا وڑاٹ اڈتننگک۔ 1947 ء ٹی ہندا دے آ بھارت بیدس کانودی سوب آن ریاست جموں و کشمیر آ زوراکی اٹ کوزہ کریسس اوکان پد آن داتم اسکان بھارتی کوزہ گیر فوج بے دردری اٹ بے گناہ و کودک کشمیری تا کشت وخون ءِ کننگ ءِ۔ داوخت آ پاکستان اٹی ہم چندی دود اڈتننگک۔ اسلام آباد اٹی لوک ورثہ ٹی 27 اکتوبر ناکشمیر تہاردے انا وخت آ چندی پروگرام تا بست وبند ءِ کننگک ہرافتے ٹی بھارت نا غیرکانودی کوزہ ٹی جموں وکشمیر اٹی بھارت نا ریاستی دہشت گردی  ءِ بے نقاب کننگک۔ پاکستان نیشنل ہیریٹیج میوزیم اٹی وزارت امور کشمیر و گلگت بلتستان نا کمک اٹ کشمیر نا بارواٹ دستاویزی فلم و عکسی نمائش آن بیدس کشمیری لوک دستکاری تا نمائش اس مریک۔ دادے انا رداٹ میڈیا ٹی ہم کشمیر کاز ءِ سوگوی تننگ کن خصوصی بست وبند کننگانے۔