مزن وزیر  محمد شہباز شریف ءِ ارشد شریف  گوما بوتگیں     اندوہناکیں وئیل ءِ   سرءَ مزن تک ءِ  آمیدگی کمیشن ءَ چہ تحقیقات کنائینگ ءِ جار

اسلام آباد۔25اکتوبر  (اے پی پی): مزن وزیر محمد شہباز شریف ءَ کینیا ءَ سینئر صحافی ارشد شریف ءِ گوما بوتگیں اندوہناکیں وئیل ءِ سرءَ مزن  تک ءِ آمیدگسی  کمیشن ءَ چہ تحقیقات کنائینگ ءِ جار جتگء ُ گشتگ کہ وئیل ءِ راستی ءَرا راج ءِ دیما کاراں، یقین دیاں کہ اے وئیل ءِ  ساپ ء ُ سلائی ءَ تحقیقات  کنائینگ بیت۔ سے شمبے ءِ روچءَ وتی ویڈیو کلوہ ءِ تہا مزن وزیرءَ گشتگ کہ کینیا ءَ سینئر صحافی ارشد شریف ءِ گوما اندوہناکیں ویئلے بوتگ کہ ما ایشی ءَ را ایرجناں، پاکستان ءِ اُلس آئی ءِ مرگ ءَ چہ با ز گمیگ اِنت ء ُ اے وئیل ءَ را امیچو ایرجنگ بہ بیت کم اِنت۔ آئی ءَ گوستگیں روچ ءَ سعودی عرب رہادگ بوہگءَچہ  پیسر کینیا ءِ صدر ءَ گوں وت گپ کتگ ء ُ آئی ءَ گوں دزبندی کتگ کہ وئیل ءِ تحقیقاتی رپورٹ مارا زوت دیم بدے ء ُ میت ءَرا زوت پاکستان ءَ دیم دیئگ ءَ وتی کردءَ  پیلو بہ کن۔  کینیا ءِ صدرءَ مارا   سرجم ءَ اوست داتگ کہ اے ہوالگءَ ایچ وڑیں کمی کنگ نابیت، کینیا ءِ  صدر ءَ  اے وئیل ءِ سرءَ ہمدردی ءِ درشانی  ہم کتگ۔ مزن وزیر ءَگشتگ کہ آئی ءَ فیصلہ کتگک  کہ اے وئیل ءِ سرءَ مزن تک ءِ آمید گسی کمیشن ءَ چہ ساپ ء ُ سلائی ءَ تحقیقات کنائینگ بیت ء ُ ایشی ءِ ھاترءَ ہائی کورٹ ءِ جج ءِ ھاترءَ دزبندی دیاں، اے فیصلہ ءِ کابینہ ءَچہ منظور کنائینگ بیت۔ مزن وزیر ءَ  گشتگ کہ اے وئیل مئےدرستانی ھاترءَ اپسوزی اِنت، راج  ءَ را یقین دیاں کہ اے تحقیقات  بیت ءُ راستی راج ءِ دیما آرگ بنت۔