پاکستان و اقوام متحدہ پائیدار شونداری کمکاری نا پنچ سال انا فریم ورک آ دستخط کریر

اسلام آباد۔ 25 اکتوبر (اے پی پی) پاکستان و اقوام متحدہ پائیدار شونداری کمکاری فریم ورک 2023 آن 2027آ دستخط کریر، سیکرٹری اقتصادی امور ڈویژن ڈاکٹر کاظم نیاز پاکستان نا کنڈآن فریم ورک آ دستخط کرے وخت اس کہ اقوام متحدہ نا نمائندگی ریذیڈنٹ اینڈ ہیومینٹیرین کوآرڈنیٹر جولین ہارنیس کرے۔ داوخت آ گپ وتران کرسا ڈاکٹر کاظم نیاز پارے کہ وزارت اقتصادی امور پائیدار شونداری نا ہدف آتا دوئی کننگ کن اقوام متحدہ نا مخ تفی و نوکاپ نا امداد و بچفنگ نا کوشست آتیٹی پدریسہ کمکاری آ اقوام متحدہ نا منت وار ءِ۔ اوپارے کہ حکومت پاکستان اقوام متحدہ تون اواری اٹ ملک اٹی مخلوق نا زند انا حالیت ءِ گچین کننگ کن قومی شونداری نا اولیت آتیٹی دیرپا کڑد ادا کننگ کن سنبرینگوک ءِ۔ اقوام متحدہ نا ریذیڈنٹ اینڈ ہیومینٹیرین کوآرڈنیٹر جہانی ادارہ نا کنڈآن پاکستان نا مخ تفی ءِ برجاتخنگ نا باوری کرفے۔ اوپارے کہ موسمیاتی بدلی ، بنداوی راجی خذمت آتا فراوانی و سوز و پائیدار اقتصادی شونداری پوسکن آ فریم ورک انا بشخ ءُ۔ اوپارے کہ اقوام متحدہ نا پائیدار شونداری کمکاری نا فریم ورک پنچ اولیتی نتیجہ غاتے مون آ دیک ہرافتے ٹی بنداوی راجی خذمت، صنفی بریبری و زالبول آتے واکدار کننگ، موسمیاتی بدلی و چاگڑد، پائیدار جامع  اقتصادی شونداری و گورننس اوار ءِ۔ اوپارے کہ ننا شریداری ٹی مون آ ہِننگ کن فریم ورک المی ءِ، دا فریم ورک پاکستان کن ہزاریہ شونداری ہدف آتا دوئی کننگ اٹ کمکار مریک۔