اسلام آباد۔ 25 اکتوبر (اے پی پی) چیئرمین سینیٹ محمد صادق سنجرانی پارینے کہ اسلام رواداری، مہرومریبت و امن ناکلہو ایتک ، دنیا ٹی ودوک آ اسلاموفوبیا مسلمان تیکن پدریسہ سنگین نتیجہ غاتا سوب جوڑ مننگ ءِ ، سینیٹ سیکرٹریٹ نا رداٹ انڈونیشیا ٹی جہانی السی سلابتی اسمبلی فورم نا بنائی دیوان آن تران کرسا چیئرمین سینیٹ پارے کہ اسلام نا دشمن مسلمان تے انفرادی و اجتماعی وڑاٹ شست کیک۔ او’’جھیڑہ غاتا ایسر‘‘ و ’’واپار نا مون آ دننگ‘‘ کن کمیٹی تا ٹہیفنگ کن جہانی پارلیمان تے سلاہ پیش کرے تانکہ دا ویل آتا ایسری کن گچین ءُ فورم اس جوڑ کننگ مرے۔ چیئرمین سینیٹ پارے کہ مسلم ملک آک اسہ اکائی نا وڑاٹ کاریم کننگ اٹ پدریسہ بے سہب مسنو، فلسطین و کشمیر اٹی مسلمان تیا کروک آ ظلم و بربریت است ہسونی نا سوب ءِ ، و روہنگیا پناہ گزین تا تنکی و اوغان تا بحالی کن پدریسہ توار بڑز کننگ نا گرج ءِ۔ اوپارے کہ اقوام متحدہ نا سلامتی کونسل و ایلو اہم فورمک دا مظلوم آتیکن لائحہ عمل اس اختیار کیر، جہانی ادارہ نا جنرل اسمبلی امنائی سلاہ اٹ اسہ قرارداد اس منظور کرے ہرا دے پاکستان او آئی سی نا کنڈآن پیش کریسس و ہرسال 15 مارچ آ اسلاموفوبیا تون مون تننگ نا جہانی دے انا وڑاٹ اڈتننگ نا پڑو ہم کننگانے۔ چیئرمین سینیٹ داہیت آ زور شاغا کہ مسلم ملک آتا ویل آتا ایسری کن لائحہ عمل اس اختیار کننگ وخت انا گرج ءِ۔ اوپارے کہ پاکستان دہشت گردی نا جنگ اٹی بے شمار جانی و مالی قربانی تسنے، کم و ود اسہ لکھ پاکستانی دہشت گردی نا جنگ انا گواچی مسر و 126 بلین ڈالر نا مالی نسخان ہرفیر۔ چیئرمین سینیٹ محمد صادق سنجرانی پارے کہ پاکستان نا سلہہ بند فوج انا سخت کوشست آتا سوب آن نن امن نا دشمن تے شکست ترسا دہشت گردی نا مون ءِ توننگ اٹ سرسہب مسونن و ننا سلہہ بند فوج انا شمار دنیا نا گچین کسبی فوج اٹی مریک، پاکستان نا سلہہ بند فوج دنیا ٹی ہر وڑنا چیلنج ءِ امنا کننگ کن مدام تیار سلک۔ اوپارے کہ جنگ و امن اٹی اقوام متحدہ نا امن مشن تیٹی پاکستان نا سلہہ بند فوج انا کڑد داہیت انا پیدوار شاہدی ءِ۔ چیئرمین سینیٹ سلاہ تس کہ بے کنڈ ہلوک وڑاٹ پرامن مذاکرات ناکمک اٹ مسلم ملک آتا نیام اٹ ساڑی جھیڑہ غاتے چٹفنگ کن کاریم کننگ کیرہ و او آئی سی نا باسک آتا نیام اٹ اقتصادی کمکاری ءِ ودفنگ کن لائحہ عمل اس اختیار کیر و داڑکن آخبتی سیکرٹریٹ اس جوڑ کننگے۔ اوپاکستان اٹی ساڑی آ دے تیٹی نوکاپ نا حالیت آتا ذکر ءِ کرسا انسانی بنداو تیا امداد گدریفنگ آ انڈونیشیا نا منت واری ءِ ہرفے و پارے کہ پاکستان نوکاپ آن پد اسہ بھلو انسانی تنکی سے نا گواچی ءِ۔ صادق سنجرانی پارے کہ آئی ٹی نا بابت سعودی عرب نا ولی عہد محمد بن سلمان، ترکی نا صدر رجب طیب اردوان و قطرانا امیر شیخ تمیم بن حمد الثانی نا کنڈآن ورناتیکن کمکاری نا معترف ءِ۔ اوجمہوریہ انڈونیشیا نا السی سلابتی اسمبلی ءِ او آئی سی، او آئی سی نا پارلیمانی یونین و مسلم ورلڈ لیگ اتون دا اہم کانفرنس نا اڈتننگ آ دلی مبارکبادی پیش کرسا پارے کہ داشاندار کانفرنس نا مثبت نتیجہ زوت مون آ بریک۔
