لاہور۔ 25 اکتوبر (اے پی پی) لاہور نا احتساب عدالت وزیراعظم محمد شہباز شریف و اونا مار حمزہ شہباز تون اوار ایلو خاہوت نا برخلاف منی لانڈرنگ و کٹیا غان زیات میرات کیس انا سماعت ءِ 15 نومبر اسکان پد بٹسا بروک آ سماعت آ نیب انا پین گواہ تے بٹنگا۔ عدالت وزیراعظم محمد شہباز شریف خاہوت نا میرات آتے منجمد کننگ نا برخلاف درخواست آ ہم کارروائی ءِ پد بٹے و وکیل آتے پین دلیل تننگ نا پارت کرے۔ احتساب عدالت نا جج قمر الزما ں کیس انا سماعت ءِ کرے۔ سے شنبےنادے آ سماعت آ وزیراعظم محمد شہباز شریف نا پلیڈر ایڈووکیٹ انوار حسین عدالت اٹی پیش مس و حاضری ءِ پورو کرفے۔ عدالت وزیراعظم محمد شہباز شریف نا آخبتی حاضری معافی نا درخواست ءِ منظور کرینے۔ سماعت اٹی مسکوہی وزیراعلیٰ حمزہ شہباز نا کنڈآن پیشی آن استثنانا درخواست تننگا و عدالت ءِ پاننگاکہ حمزہ شہباز مخ انا خل اٹی تکلیف نا سوب آن عدالت اٹ پیش مننگ کتو۔ درخواست اٹی خواست کننگاکہ حمزہ شہباز نا اسہ دے انا حاضری معافی نا درخواست ءِ منظور کننگے۔ عدالت درخواست ءِ منظور کرے و عدالت بروک آ سماعت آ گواہ تے بیان قلمبند کرفنگ کن بٹنگا۔ نیب ریفرنس نا رداٹ شریف خاہوت تون اوار ایلوفتیا 7 ارب 32 کروڑ آن زیات نا منی لانڈرنگ و غیرکانودی میرات جوڑ کننگ نا دوبہ خلوک ءِ۔ داکان بیدس عدالت نا روبرو وزیراعظم محمد شہباز شریف ، نصرت شہباز ، حمزہ شہباز، تہمینہ درانی نا منجمد میرات آتا بحالی نا درخواست آ ہم سماعت مس۔ عدالت وزیراعظم محمد شہباز شریف ، حمزہ شہباز ، نصرت شہباز ، تہمینہ درانی و کمپنی تا میرات آتے منجمد کننگ نا پرمان کریسس۔ میرات آتے بحال کننگ کن درخواست اٹی موقف اختیار کننگانے کہ احتساب عدالت نا میرات آتے منجمد کننگ نا پرمان درست اف، میرات آتا منجمد مننگ نا سوب آن بھاز انگا منسلک مخلوق زہمی مننگ ءُ، خواست ءِ کہ عدالت میرات آتے منجمد کننگ نا پرمان تے کالعدم گوندے ہراڑا عدالت نیب پراسیکیوٹر آن بروک آ سماعت آ ورندی بٹنگا و فریق آتا وکیل آتے دلیل پیش کننگ نا ہم پارت کرے۔ عدالت مستی سماعت ءِ 15 نومبر اسکان پدبٹے۔
