اسلام آباد۔ 25 اکتوبر (اے پی پی) وزیراعظم نا سلاہکار امور کشمیر و گلگت بلتستان قمر زمان کائرہ پارینے کہ پاکستان کشمیر نا بابت تینا موقف آ مدام سلوک ءِ و اسہ انچ اس ہم پدی مفک ، قومک تینا تہوار ءِ مدام اسہ خاص ءُ مسخت اسے نا رداٹ اڈ ایترہ، و تینا مزل ءِ دوئی کننگ کن پیڑی تیا کوشست کیرہ و المی اف کہ دمدستی مزل ملے۔ اوڑکن بے شمار قربانی تروئی تمک پاکستان تون انڈیا نا مخالفت ءِ ہندادے کہ او وخت اس ہم پاکستان نا وجود ءِ امنا ہی کتنے اوفتا است آتیٹی اولیکو دے آن دشمنی نا لاوہ جوش کننگ ءِ ۔ او انسٹی ٹیوٹ آف ریجنل اسٹڈیز اٹی ’’کشمیر ہندوستان گمانی الحاق‘‘ نا سرحال آ تران کریکہ۔ اوپارے کہ پاکستان مدام کشمیری تا موقف ءِ امنا کرینے بلکن وخت اس ہم اودے کشمیر نا ویل تکتنے بلکن پاکستان نا ویل تکانے۔ گورنمنٹ چائے ہراکہ مرے ہراکہ جماعت برسراقتدار مرے، کشمیر نا بارواٹی پاکستان نا موقف مدام اسٹ مسنے۔ ہندوستان مدام ظلم و جور و چندی چم آتے اٹ کشمیر نا جغرافیائی حالیت آتے لتاڑنگ نا کوشست کرینے۔ اینو ہم ہندوستان نا دا پالیسی مسنے کہ کشمیر ءِ جہانی منظر آن اینک کننگے ہراڑکن او شہریت و ڈومیسائل نا کانود اٹی بدلی کننگ ءِ۔ پاکستان پیپلزپارٹی نا بنداو ءِ کشمیر ایشو’’مزور‘‘ بزغر و اقلیت آتا حق آ تخنگانے۔ ننا جماعت کشمیر ایشو ءِ ہرفورم آ بڑز کیک۔ غٹ ملک آتا پالیسی ہندن مریک کہ تینا فائدہ نا رداٹ ہی چلینگرہ داہیت اسُل پیدوار ءِ کہ کشمیر نا ویل ءِ زیات گچین وڑاٹ تالان کننگ کن پاکستان نا زرگزران نا سوگو مننگ بھاز المی ءِ۔ ننے کشمیر نا ویل ءِ جتا ٹاک شو، سیمینار و تعلیمی ادارہ غاتیٹی تالان کرسا چین تے گچین وڑاٹ روشنا کرفوئی ءِ۔ ہندوستان نا تہہ ٹی ہندو، سکھ و چندی مذہب آتا مخلوق بے رکھ ءُ۔ دنیا ٹی جور و بیدادی نا کانود نا رداٹ قوم تا حق آتے توننگ مفک و داوڑنا وڑوڈول آتے اٹ ملک آتے فتح کننگ مفک۔ اوپارے کہ نن مدام کشمیر ایشو و پاکستان نا اسہ اسہ انچ انا دفاع ءِ کینہ۔ صحافی ارشد شریف کن اسہ سوج اسے نا ورندی ٹی اوپارے کہ پاکستان نا حکومت غٹ باندا ت آتیا نظر تخانے۔ دود آن صدر کشمیر یوتھ الائنس طاہر مجاہد ہم تران کرے۔
