بیجنگ۔ 25 اکتوبر (اے پی پی) چین اٹی پاکستانی سفیر معین الحق پارینے کہ نن دا سال پیلس میوزیم اٹی پاکستان اٹی گندھارا آرٹ آ اسہ بھا زاہم ءُ نمائش اسے نا بناءِ کینہ۔ داخیال آتا درشانی ءِ او چائنہ اکنامک نیٹ ءِ اسہ خصوصی انٹرویو اسے ٹی کرے۔ سیل و سوات و دودوربیدگی صنعت آتیٹی چین پاکستان کمکاری نا بھلالائخی آ زور شاغسا، سفیر سی ای این ءِ پارے کہ ہڑتوم آ ملک آتا نیام اٹ سرجزآتا اسہ فہرست اسے نا اشتراک ءِ کننگانے، اومستی پارے کہ دا دود آتیٹی دودوربیدگی نمائش و ٹور آپریٹر آتا کمک اٹ چین انا دورہ اوار مریک۔ چین و پاکستان نا نیام اٹ فروری نا اسیجائی بیان اٹی گندھارا آرٹ انا نمائش نا ذکر ءِ ہم کننگانے۔ فریق آک ہڑتوم آ ملک آتا میرات و دُر آتا رکھ و پیش کش کن کمکاری ءِ پین مون آ دیرہ۔ ساڑی آ سال تیٹی چین و پاکستان سیل و سوات و دودوربیدگی صنعت آتیٹی کمکاری ءِ ودفینے۔ درور نا وڑاٹ، اِرا پاکستانی اینی میٹڈ فلم تدوک آ سال چینی سینما اُراتیا بس، ہراٹی دی ڈونکی کنگ چین اٹی گچین کارکڑد نشان تروک پاکستانی فلم پک مس، ہندا سال ہڑتوم آ کنڈآتا سیل و سواتی ہن و بر ءِ پین مون آ دننگ کن سیل و سواتی کمکاری آ اسہ مفاہمت نامہ سے آ دستخط کننگا۔
