Turn off for: Urduبھارتی بربریت نا برخلاف پدریسہ استقامت ، کشمیری الس نرزوری نا پوسکن ءُ تاریخ اس نوشتہ کننگ اٹیءِ ، ترانکار آتا دود آن تران

اسلام آباد۔ 25 اکتوبر (اے پی پی) کشمیر انسٹی ٹیوٹ آف انٹرنیشنل ریلیشنز نا کنڈآن اسہ سیمینار اسے ٹی ترانکار آک کشمیری تے اوفتا مریس جہد آجوئی و قربانی تا ستاءِ کرسا پارینو کہ کشمیری الس مزاحمت و نرزوری نا اسہ پوسکن ءُ تاریخ اس نوشتہ کننگءِ ۔ کشمیر میڈیا سروس نا رداٹ ’’آجوئی، انصاف و بریبری: بھارت نا 75 سال انا غیر کانودی کوزہ نا برخلاف کشمیری تا استقامت‘‘ نا سرحال آ اڈ ہلوک سیمینار اٹی تعلیم نا چاہندار، سیاسی راہشون، مسکوہی سفارتکار و انسانی حق انا کارندہ غاک بشخ ہلکر۔ داوخت آ مسکوہی وزیراعظم آزاد جموں وکشمیر سردار عتیق احمد خان آن بیدس قومی اسمبلی نا باسک مسرت زارا، مسلم لیگ ن آزاد کشمیر شاخ انا صدر شاہ غلام قادر، سفیر ممتاززارا بلوچ ، ایگزیکٹیو ڈائریکٹر سی پی ڈی آر ارشاد محمود ،کے آئی آئی آر نا چیئرمین الطاف حسین وانی، اے پی ایچ سی راہشون شمیم شال ، شاہزادہ یوسف رضا و ایلوفک ہم ساڑی ئسر۔ ترانکارآک کشمیری تا حالیت زار ءِ تالان کرسا پاریر کہ تدوک آ 75 سال اٹی بھارت نا کوزہ ٹی جموں وکشمیر نا الس دنیا نا مسٹ میکو بھلا فوج انا دوتے اٹ ظلم و جور انا گواچی مننگ ءُ۔ اوبھارتی فوج انا کنڈآن ریاستی دہشت گردی و انسانی حق انا خلاف ورزی تا ودوک آ واقعہ غاتیا سخت گڑتی نا درشانی ءِ کرسا پاریر کہ بھارت کودک کشمیری تا دتر اٹ گوازی کننگ ءِ۔ اوپارے کہ جہانی برادری نا کنڈآن مظلوم کشمیری تے بھارت نا ظالمانہ کوزہ نا رحم وکرم آ اِلنگ بھلو نا انصافی اس مریک۔ اونا پاننگ ئس کہ کشمیریک تدوک آ کیہی دہائی تیٹی جانی و مالی بھلو کچ اسے آ قربانی تسنو۔ ترانکارآک پاریر کہ بھارتی ریاستی دہشت گردی آن مقبوضہ علاقہ ٹی ہر زند انا بشخ بھاز بے وڑزہمی مسنے۔ اوفک پاریر کہ مقبوضہ علاقہ ٹی سیاسی و انسانی حق انا حالیت نسل پرست مودی حکومت نا کنڈآن اگست 2019 اٹی جموں وکشمیر نا خصوصی حیثیت نا منسوخی آن پد پین بگڑینگانے، مودی حکومت نا دا غیرکانودی گام گیج آن پد کشمیری تا راجی، سیاسی و زرگزرانی زند بھاز بے وڑ زہمی مسنے۔