اسلام آباد۔ 24 اکتوبر (اے پی پی) وزیراعظم محمد شہباز شریف پارینے کہ ایشیائی شونداری بینک شونداری کن ننا شریدار ءِ، بریس پروگرام راجی رکھ اکن حکومتی گام گیج آتا کمکار و نوکاپ زہمی علاقہ غاتیٹی ریلیف و بحالی کن اہم ءُ کڑد اس ادا کیک۔ او دوشنبےنادے آ بریس پروگرام نا رداٹ وام انا فراوانی نامعاہدہ غا دستخط آتا دود آن تران کریکہ۔ دود اٹی بنجائی وزیر خزانہ سینیٹر اسحاق ڈار ، بنجائی وزیر اقتصادی امور ایاز صادق،اے ڈی بی نا وائس پریذیڈنٹ و ایلوفک ہم ساڑی ئسر۔ وزیراعظم پارے کہ دا مشکل وخت اٹی اے ڈی بی نا کنڈآن کمکاری نا منت واری ءِ ہرفنہ، ایشیائی شونداری بینک چندی اہم پروگرام تا شفافیت اٹ پوروی کن پبی کمک کریے و شونداری کن ننا شریدار مسنے، بریس پروگرام راجی رکھ اکن حکومتی گام گیج آتا کمکاری نا چرجوئی ٹی ہم اہم ءُ کڑد اس ادا کیک۔ وزیراعظم پارے کہ دامشکل ساہت اٹی پاکستان نا کمکاری کن دا اہم پروگرام ننا زرگزران نا سوگوی و آخبت نا گرج آتا بابت ہم کمکار جوڑ مریک۔ وزیرخزانہ سینیٹر اسحاق ڈار پروگرام نا بناغا اے ڈی بی نا منت واری ءِ ہرفے و پارے کہ ساڑی حکومت وزیراعظم شہباز شریف نا کماشی ٹی دا زرگزرانی ویل و چیلنج آتون مون تننگ کن کوشست کننگ ءِ ہرا مسکوہی حکومت نا کنڈآن میرات اٹی ملانو، ملک ءِ نوکاپ نا حالیت اٹ اسہ قدرتی آفت اس مون تروک ءِ، نوکاپ آن مروک آ نسخان تا کساس 32.4 ارب ڈالرآن زیات خلنگانے، حکومت تنیا دا مشکل حالیت آتون مون تننگ کپک، زہمی تیٹی 70 ارب روپئی نا نغد امداد نا بشخنگ برجاءِ۔ بنجائی وزیر اقتصادی امور ایاز صادق ہم پروگرام آ اے ڈی بی نا منت واری ءِ ہرفے و پارے کہ بنجائی حکومت صوبائی حکومت آتون اواری اٹ نوکاپ زہمی تا کمک کن پبی گام گیج کننگ اٹی ءِ۔ داوخت آ اے ڈی بی نا وائس پریذیڈنٹ پارے کہ بریس پروگرام 1.5 ارب ڈالر نا پروگرام اسے و نوکاپ زہمی علاقہ غاتیٹی زہمی تا بحالی و ریلیف کن اہم ءُ کڑد اس ادا کیک۔
