اسلام آباد۔ 24 اکتوبر (اے پی پی) بنجائی وزیر حوالکاری وشینکاری مریم اورنگزیب سینئر صحافی و اینکر پرسن ارشد شریف نا کینیا ٹی است ہسون مرک آ ارشد شریف نالمہ و پاکستان اٹی کینیا ناسفیر ءِ ٹیلفون کرے۔ ارشد شریف نا لمہ تون ہڑزخواہی نا درشانی ءِ کرسا اوپارے کہ حکومت پاکستان ارشد شریف نا مرک انا بابت کینیا نا حکومت و تعلقدار کمامدارآتون رابطہ ٹی ءِ۔ اوارشد شریف نا لمہ ءِ اونا مار انا مرک آ داتم اسکان مروک آ پیش رفت و دوئی مروک معلومداری تیان معلومدار کرے۔ اوپارے کہ ارشد شریف نا مرک آ بھاز ڈکھیا ءِ، خاہوت نا غم اٹی بریبر نا شریک اُن۔ ارشد شریف نامرک انا سوب آتا ڈس و نشان ءِ خلنگ نا کوشست برجاءِ۔ اوپارے کہ کینیا نا حکومت سرکاری وڑاٹ ارشد شریف نا مرک انا بارواٹی داتم اسکان ہچ پاتنے، ہندن کہ کینیا نا حکومت ننے معلومدار کیک، نن سرجم حوال آتیان ارشد شریف نا خاہوت و الس ءِمعلومدار کینہ۔ اوپارے کہ حکومت پاکستان کینیا نا حکومت و تعلقدار کمامدارآتون رابطہ ٹی ءِ۔ اوپارے کہ پاکستانی میڈیا غا ارشد شریف نا بابت برجا قیاس آرائی است ہسونی نا سوب ءِ، کینیا ٹی پاکستان نا سفیر پولیس کمامدارآتون رابطہ ٹی ءِ و آئی جی نا دفتر آ ہِننگ ءِ۔ داکان بیدس پاکستان اٹی کینیا نا سفیر تون ہم رابطہ مسنے ہرا پورو کمکاری نا باور کرفینے۔ پاکستان اٹی کینیا نا سفیر تینا حکومت آن معلومداری ہلسا ننے معلومدار کیک۔ وزارت داخلہ کینیا نا سیکورٹی ایجنسی تتون رابطہ ٹی ءِ، راستکی تے الس نا مون آ اتینہ۔ اوپارے کہ پک راستکی تا مون آ بننگ اسکان قیاس آرائی تیان پاناد کننگے۔ ارشد شریف نا مرک انا بابت غٹ راستکی تسکان سرمرینہ۔ بنجائی وزیر حوالکاری دعاکرے کہ اللہ تعالیٰ ایماندار ءِ جنت الفردوس اٹی بڑزکو ہند اس و خاہوت ءِ صبر و جمیل عطاکے۔
