استنبول۔ 24 اکتوبر (اے پی پی) بنجائی وزیر حوالکاری و شینکاری مریم اورنگزیب ایران اٹی اڈ ہلوک آ فلم فیسٹیول اٹی پاکستانی فلم آتا نمائش نا پڑو ءِ کرسا پارینے کہ پاکستان ایران تون فلم و راگ انا بشخ آتیٹی کمکاری ءِ پین مون آ دننگ نا خواہندار ءِ، ایرانی فلم ساز حکومت پاکستان نا کنڈآن فلم انڈسٹری کن تروک آ آسودہی تیان فائدہ ہرفنگ کیرہ۔ داہیت ءِ او او آئی سی وزراء اطلاعات کانفرنس نا 12 می دیوان نا وخت آ ایرانی وزیر دودوربیدگ محمد مہدی اسماعیلی تون اوڑدہی ٹی گپ وتران کرسا پارے۔ اوڑدہی ٹی ہڑتوم آملک آتا نیام اٹ اقتصادی ، واپاری ، دودوربیدگی و الس نا کہول آ رابطہ تون اوار چندی بشخ آتیٹی ہڑتوم آکنڈآتا کمکاری ءِ پین سوگو و گیشتر کننگ آ امنا مس۔ داوخت آ بنجائی وزیر حوالکاری پارے کہ پاکستان و ایران نا نیام اٹ تاریخی برادرانہ تعلقداری ءِ، ہڑتوم آ ملک آتا الس اسہ ایول تون دودوربیدگی و مذہبی راشتہ غاتون تفوک ءُ۔ اوپارے کہ پاکستان ایران تون فلم و راگ انا بشخ آتیٹی کمکاری ءِ مون آ دننگ خواہک۔ مریم اورنگزیب پارے کہ ایرانی فلم فیسٹیول اٹی پاکستانی فلم آتے نمائش کن پیش کننگک ۔ اوپارے کہ حکومت پاکستان 2022ء نا بجٹ اٹی فلم انڈسٹری، دودوربیدگ و سیل و سوات نا بشخ آ خراج ءِ چٹفینے۔ درملکی فلم ساز آتے ہندی کہو ل و فلم و راگ انا اسیجائی ڈٹ آتیٹی ری بیٹ تننگ انگ ءِ۔ ایران نا فلم ساز ہم پاکستان اٹی فلم انڈسٹری کن حکومت نا کنڈآن تروک آ آسودہی تیان فائدہ ہرفنگ کیرہ۔ اوڑدہی ٹی ہڑتوم آملک آتا حوالکاری و دودوربیدگ نا بشخ آتیٹی کمکاری ءِ مون آ دننگ و ڈل آتا ہن و بر آ امنا مس۔ بنجائی وزیر حوالکاری پاکستان اٹی بھسکار نوکاپ نا رداٹ پاکستانی قوم اتون یکجہتی و مخ تفی آ ایران نا منت واری ءِ ہرفے۔ داوخت آ ایرانی وزیر دودوربیدگ پاکستان تون حوالکاری و فن و دودوربیدگ نا بشخ آتیٹی کمکاری ءِ پین سوگو کننگ نا عزم انا درشانی ءِ کرے و بنجائی وزیر حوالکاری ءِ ایران اٹی اڈ ہلوک آ فلم فیسٹیول اٹی بشخ ہلنگ نا سلہ خلک۔
