واشنگٹن۔ 24 اکتوبر (اے پی پی) امریکہ ٹی پاکستان نا سفیر مسعود خان لکھ آ نوکاپ زہمی تیکن کنوئی آ ساف دیر انا دمدستی فراوانی نا گرج آ زور شاغانے و پارینے کہ کنوئی آ ساف دیر انا کمتی و زہمی علاقہ غاتیٹی نوکاپی دیر انا سلنگ نا سوب آن ودی مروک آ ناجوڑی تیان نوکاپ زہمی تا مشکل آتیٹی پین ودکی مسنے۔ اوسولر واٹر پلانٹ آتا کمک اٹ کنوئی آ دیر انا ساف فراوانی کن کاریم کروک آ امریکی تنظیم ہیومن نیسیسٹی فاؤنڈیشن (ایچ این ایف) نا کنڈآن فنڈ ریزنگ دود اٹی پارے کہ نوکاپ زہمی تا بحالی و تعمیر نو کن پاکستان ءِ جہانی برادری نا دمدستی و پدریسہ کمک نا گرج ءِ۔ اوتنظیم نا ڈائریکٹر فوزیہ قصوری و اونا سنگت آتا کوشست آتا ستاءِ کرسا پارے کہ او نوکاپ زہمی تا بنداوی گرج آتے پورو کننگ ءُ۔ اوپارے کہ چاگڑدی بدلی نا سوب جوڑ مروک نوکاپ نا سوب آن 3 کروڑ 30 لکھ بندغ زہمی مسنو ہرا امریکی ریاست کیلفورنیا نا آبادی آن زیات ءُ و پاکستان نا 95 ہزار سکوائر میل رقبہ نوکاپ اٹی ڈبنگا ہرا امریکی ریاست کولوراڈونا علاقہ غان زیات ءِ ہرانا 66 لکھ بندغ آتے دمدستی چکار و کمک نا گرج ءِ۔ اوپاکستان اٹی ریسکیو و ریلیف آپریشن تیٹی بھلو کچ اسے آ کمکاری آ اقوام متحدہ، جہانی برادری و امریکی حکومت و الس نا منت واری ءِ ہرفے و زہمی تے امداد فراوان کننگ آ پاکستانی پردیسی تا ستاءِ کرے۔ پاکستانی سفیر مسعود خان پارے کہ داوخت آ حقی چیلنج نوکاپ زہمی تا روزگار نا بحالی و تعمیر ءِ۔ ہراڑکن ننے تینا سنگت ملک، سخی و خاص وڑاٹ پاکستانی امریکی کمیونٹی نا پدریسہ کمک نا گرج ءِ۔ ہرافک مدام مشکل وخت اٹ ننا کمک ءِ کریر۔ پاکستانی سفیر پاکستانی نژاد امریکی کمیونٹی نا تعمیری کڑد و امریکی راج اٹی اوفتا ترند شونداری نا ستاءِ کرے۔ اوپارے کہ امریکی راج اٹی مہالو اقتصادی پنجر و داسہ سیاسی منظرنامہ ٹی پاکستانی کمیونٹی نا یکجہتی واقعی متاثر کن مسنے۔
