اسلام آباد۔ 24 اکتوبر (اے پی پی) بنجائی دارالحکومت اسلام آباد اٹی پولیو تور مہم دوشنبےنادے آن بناکرینے ہرا بروک آ7 دے اسکان برجاسلک۔ ضلعی انتظامیہ نا رداٹ ڈپٹی کمشنر اسلام آباد عرفان نواز میمن نا پارت آ اسسٹنٹ کمشنر آک تینا تینا علاقہ غاتیٹی پولیو تور مہم نا بابت پولیو ٹیم تتون اوار دورہ ءِ کریر۔ مہم اٹی پنچ سال آن کم وئی نا چناتے پولیو تور انا ویکسین کنفنگک۔ اسسٹنٹ کمشنر رورل روات بی ایچ یو ٹی پولیو تور مہم نا چرجوئی ٹی اسمبلی پوائنٹ آتا دورہ ءِ کرے، پارت جاری کرے کہ غٹ ٹیمک انتظامیہ تون اواری اٹ گچین رابطہ ءِ پک کیر تانکہ غٹ ویل آتے وخت آ ایسر کننگ مرے۔ اسسٹنٹ کمشنر سٹی ایف سیون اٹی پولیو ٹیم تا چندی اسمبلی پوائنٹ آتا دورہ ءِ کرے۔ اسسٹنٹ کمشنر شالیمار ڈی ایچ ایس ایف الیون نا دورہ ءِ کرے، مہم نا ایس او پی تیا گچین عملدرآمد کن ٹیم تے المی پارت جاری کننگا۔ اسسٹنٹ کمشنر صدر آئی ٹین اٹی پولیو تور مہم ٹیم اسمبلی ٹی بشخ ہلک، فیلڈ اسٹاف ءِ زیات آن زیات این اے و انکار نا کوریج ءِ پک کننگ نا ترغیب تننگا و ویل آتے وخت آ شیئر کننگ نا پارت کننگانے تانکہ انتظامیہ نا کنڈآن جوان کارروائی کننگ مرے۔
