سرینگر۔ 24 اکتوبر (اے پی پی) بھارت نا غیرکانودی کوزہ ٹی جموں وکشمیر اٹی کل جماعتی حریت کانفرنس نا سینئر راہشون مولوی بشیر احمد عرفانی پارینے کہ 27 اکتوبر کشمیر نا تاریخ ناہمو تہار آ دے ءِ ہراتم بھارت جارحیت کرسا جموںوکشمیر آ غاصبانہ کوزہ کریسس۔ کشمیر میڈیا سروس نا رداٹ مولوی بشیر احمد عرفانی سرینگر اٹی جاری اسہ بیان اسے ٹی پارے کہ 75 سال مست 27 اکتوبر آ بھارت تینا فوج ءِ کشمیر نا گل زمین آ دڑفے و اوڑا غیرکانودی ، غیراخلاقی و جبری کوزہ کریسس۔ اوپارے کہ ریاست جموں وکشمیر نا غیرتی الس بھارت نا دا ناروا کوزہ ءِ اسُل امنا کتور و اولیکو دے آن اونا برخلاف توار بڑزکریر۔ اوپارے کہ ہمودے آن ہلیس اینو اسکان بھارت کشمیری تیا ظلم و بیدادی نا چٹپروک آ چرجوئی نا بناءِ کرینے۔ دا ہفت دہائی ٹی کشمیری تے بدترین ریاستی دہشت گردی نا شست کننگا ولے نرزور کشمیری قوم بھارت نا ظلم و جارحیت نا مون آ وخت اس ہم سلہہ بٹتویر و بھارتی فوج انا ہر ظلم انا مون آ سلیسر۔ حریت راہشون پارے کہ داوخت آ لکھ آ کشمیری تے شہید کننگا، ہزار آتے چندی عقوبت خانہ غاتیٹی بیدادی نا شست کرسا معذور کننگا، ہزار آتے سال آ سال اسکان نظربند تخنگا حتی کہ بیست ءُ یک می صدی ٹی ہم چنکا چناتے پیلٹ گن آتے اٹ سم کاری کرسا بینائی آن محروم کننگا۔ اوپارے کہ دا ظلم و ستم آن پد ہم بھارت تحریک آجوکشمیر ءِ توننگ اٹ بے سہب مس، ہنداخاطران مودی حکومت 5 اگست 2019 آ دفعہ 370 و A35ءِ منسوخ کرسا کشمیر اٹی آبادی نا کچ ءِ بدل کننگ نا کسر ءِ آوار کرے۔ ریاست جموں و کشمیر نا شیرازہ ءِ تالان کرسا اودے اِرا بشخ آتیٹی بشخنگا و جھیڑہ ئی ریاست نا حیثیت ءِ بدل کرسا داڑے مسلم گیشتری ءِ اقلیت اٹ بدل کننگ نا بنداو ءِ تخنگا۔ بھارتی حکومت غیرریاستی باتی تے 40 آن 50 لکھ ڈومیسائل سرٹیفکیٹ جاری کرے تانکہ ریاست نا مسلم گیشتری ءِ اقلیت اٹ بدل کننگ کے۔
