سرینگر۔ 24 اکتوبر (اے پی پی) بھارت نا غیر کانودی کوزہ ٹی جموں و کشمیر اٹی کل جماعتی حریت کانفرنس مخلوق آ زور شاغانے کہ او 27 اکتوبر آ پورو ہڑتال کیر تانکہ دنیا ءِ دا کلہو ءِ تننگ مرے کہ کشمیریک تینا وطن آ بھارت نا ناروا کوزہ ءِ دمدستی چٹفنگ خوارہ۔ کشمیر میڈیا سروس نا رداٹ 27 اکتوبر 1947 آ بھارتی فوجیک تقسیم برصغیر نا ڈٹ انا پاش آن پاش خلاف ورزی ءِ کرسا و کشمیری تا است خواہی تیان چپ جموں وکشمیر آ جلہو کرسا اوڑا کوزہ کریسر۔ کل جماعتی حریت کانفرنس سرینگر اٹی جاری اسہ بیان اسےٹی مچ آ دنیا ٹی رہینگوک آ غٹ کشمیری تیان ہم 27 اکتوبر آ تہاردے انا وڑاٹ اڈتننگ نا خواست کرینے۔ بیان اٹی پاننگانے کہ کشمیریک ہر روا وڑاٹ حق خودارادیت نا خواست کننگ ءُ ہرانا اوفتے تون قول ءِ کننگانے ولے بھارت بے گناہ کشمیری تے طاقت نا زور آ توننگ نا کوشست کننگ ءِ۔ بیان اٹی پاننگانے کہ مقبوضہ جموں وکشمیر ءِ اسہ فوجی چھاؤنی اسے ٹی بدل کننگانے و داڑے جبری بے گواہی، حراستی خون، زیزاریفنگ و بیدادی نا شست کننگ ہڑدے نا معمول ءِ۔ حریت کانفرنس جہانی برادری آ زور شاغا کہ او مقبوضہ علاقہ ٹی بھارتی فورس آتا کنڈآن برجا انسانی حق انا بھلا و منظم خلاف ورزی تا نوٹس ءِ ہلے و حالیت آتیا نظر تخنگ کن اقوام متحدہ نا اسہ ٹیم اس مقبوضہ جموں وکشمیر آ گدریفے۔
