اسلام آباد۔ 24 اکتوبر (اے پی پی) چیئرمین سینیٹ محمد صادق سنجرانی پارینے کہ کشمیری الس نا جہد آجوئی زوت سرسہب مریک، 75 سال مست کشمیری الس جہد آجوئی نا کمک اٹ ریاست آزاد جموں وکشمیر نا بنداو ءِ تخار۔ دوشنبےنادے آ75 می یوم تاسیس کشمیر نا وخت آ کشمیری الس تون یکجہتی نا درشانی ءِ کرسا تینا کلہو اٹی اوپارے کہ پاکستانی حکومت و الس تینا کشمیری ایلم تتون سلوک ءُ۔ جہانی برادری مقبوضہ کشمیر اٹی بھارت نا کنڈآن انسانی حق انا لتاڑتا نوٹس ءِ ہلے۔ 5 اگست 2019 آ بھارت کشمیری الس ءِ حق خودارادیت آ جلہو کرے و بھارت چم بازی تے اٹ زیات ہرے اسکان تینا غیرکانودی کوزہ ءِ تخنگ کپک۔ بھارت نا فاشٹ حکومت نا چم آک کشمیری الس نا عزم و حوصلہ ءِ شیف شاغنگ کپک۔ چیئرمین سینیٹ محمد صادق سنجرانی پارے کہ نن تینا ایلم و ایڑھ تا روا مسخت حق خودارادیت نا جہد اٹی اوفتے تون ہم کوپہ سلوک اُن۔ مقبوضہ کشمیر نا پرامن الس پدریسہ مشکل غاتا گواچی ءُ و نئے بیرہ اوفتا حق خودارادیت آن انکار کننگ انگ ءِ بلکن اوفتے بدترین انسانی حق انا خلاف ورزی تا شست ہم کننگ انگ ءِ۔ کشمیری الس تینا حق خودارادیت کن بے مٹ قربانی تسنو، مقبوضہ کشمیر نا الس نا است خواہی تا رداٹ دا جھیڑہ نا انصاف اٹ و پرامن ایسری ڈیہہ ٹی پائیدار امن کن بھاز اہم ءِ۔ چیئرمین سینیٹ پارے کہ جہانی برادری کشمیری تے اوفتا حق خودارادیت نا دوئی کننگ اٹ تینا پبی کڑد ءِ ادا کے۔ پاکستان نا حکومت و الس مقبوضہ کشمیر نا الس نا است خواہی و اوفتا بنداوی حق انا رکھ اکن کشمیر نا جھیڑہ نا انصاف اٹ و پرامن ایسر اسکان مدام اوفتے تون سلرہ۔ اوپارے کہ پاکستان نا حکومت و پارلیمان مدام کشمیر نا مقدمہ ءِ ہرفورم آ پبی وڑاٹ تالان کرینو و دا جھیڑہ نا پرامن ایسری کن تینا تعمیری کڑد ءِ ادا کرسا کیرہ۔
