اسلام آباد۔ 24 اکتوبر (اے پی پی) اسپیکر قومی اسمبلی راجہ پرویز اشرف و ڈپٹی اسپیکر زاہد اکرم درانی ئسک آزاد ریاست جموں وکشمیر نا 75 می یوم تاسیس آ آزاد جموں وکشمیر نا حکومت و الس ءِ مبارکبادی تسنو۔ دوشنبےنادے آ تینا کلہو اٹی اوفک پاریر کہ 75 سال مست اینونادے کشمیری الس جہد آجوئی نا کمک اٹ ریاست آزاد جموں و کشمیر نا بنداو ءِ تخا۔ ریاست آزاد جموں وکشمیر نا بنداو داہیت انا شاہدی ءِ کہ کشمیری الس بھارتی کوزہ غان آجوئی خواہک۔ جموں وکشمیر نا آجوئی نا سفر داسکان برجاءِ۔ کشمیری الس تینا حق خودارادیت کن بے مٹ قربانی تسنے۔ اسپیکر پارے کہ 5 اگست 2019 آ بھارت کشمیری الس نا حق خودارادیت آ جلہو کرے و بھارت لکھ آ غیر ریاستی باتی تے ڈومیسائل جاری کرسا اقوام متحدہ نا قرارداد آتون روگردانی کرے۔ بھارت غیر ریاستی باتی تے مقبوضہ جموں وکشمیر اٹی ڈومیسائل جاری کرسا مسلم گیشتری ءِ اقلیت اٹ بدل کننگ خواہک۔ بھارت نا فاشٹ حکومت نا چم آک کشمیری الس نا حوصلہ ءِ شیف شاغنگ کپسہ۔ وزیرخارجہ بلاول بھٹو زرداری دنیا نا ہرفورم آ کشمیری تا حق اکن پبی وڑاٹ توار بڑز کننگ ءِ۔ ڈپٹی اسپیکر پارے کہ بھارتی حکومت نا ریاستی دہشت گردی کشمیری تا عزم ءِ شکست تننگ کپک۔ پاکستان نا حکومت و پارلیمان مدام کشمیر نا مقدمہ تون ہرفورم آ مو ن تسنو۔ ڈیہہ ٹی پائیدار امن کن کشمیر نا ویل ءِ کشمیری الس نا است خواہی و اقوام متحدہ نا قرارداد آتا رداٹ ایسر المی ءِ۔ پاکستان کشمیری الس نا دنیا نا ہر فورم آکشمیرنا ویل انا ایسر اسکان سفارتی ، اخلاقی و سیاسی کمکاری ءِ برجاتخک۔
