اسلام آباد۔ 21 اکتوبر (اے پی پی) وزیراعظم محمد شہباز شریف پارینے کہ حکومت الیکٹرک وہیکل آتا کچ اٹی ودکی و اوڑکن مچ آ ملک اٹی بھلو کچ اسے آ انفراسٹرکچر نا تفنگ نا جوان حکمت عملی آ عملدرآمد کیک، پاکستان شون ہلوک ملک آتا ودی کروک موسمیاتی بدلی نا اثرآتا بھرم ءِ کُننگ ءِ ، ساڑی ہی ٹی ملک اٹی 10 ہزار میگاواٹ شمسی توانائی نا ڈٹ آتا منظوری ءِ تسنے۔ جمعہ نادے آ وزیراعظم آفس نا میڈیا ونگ آن جاری بیان نا رداٹ وزیراعظم نا کماشی ٹی ملک اٹی پبلک ٹرانسپورٹ اٹی الیکٹرک بس آتا اوار مننگ، الیکٹرک وہیکل آتا صنعت و کمکار انفراسٹرکچرنا تفنگ و قابل تجدید توانائی نا ذریعہ غا بڑزکو کہول انا دیوان اس اڈ ہلک۔ دیوان ءِ پبلک ٹرانسپورٹ اٹی الیکٹرک بس آتا اوار مننگ نا بابت سلاہ پیش کننگا۔ دیوان ءِ مچ آ دنیا ٹی ساڑی الیکٹرک بس و گاڈی تا صنعت و پاکستان اٹی داصنعت نا تفنگ نا بابت ہم سرجمی وڑاٹ معلومدار کننگا۔ وزیراعظم دیوان آن تران کرسا پارے کہ پاکستان شون ہلوک ملک آتا ودی کروک موسمیاتی بدلی نا اثرآتا بھرم ءِ کُننگ ءِ۔ حکومت موسمیاتی بدلی ٹی کارگر زموار آتا توننگ ءِ تینا اولیت آتیٹی اوار کننگ ءِ۔ حکومت الیکٹرک وہیکل آتا کچ اٹی ودکی و اوڑکن مچ آ ملک اٹی بھلو کچ اسے آ انفراسٹرکچر نا تفنگ نا جوان حکمت عملی آعملدرآمد کیک۔ اوپارے کہ ای ساڑی ہی ٹی ملک اٹی 10 ہزار میگاواٹ شمسی توانائی نا ڈٹ آتا منظوری ءِ تسونٹ۔ حکومت پاکستان ءِ توانائی نا بشخ اٹی خودکفیل جوڑ کننگ کن قابل تجدید توانائی ٹی زرکاری نا است بڈی ءِ کننگ ءِ۔ ڈٹ آن نئے بیرہ چاگڑدی کچٹی کم مریک، کم نرخ آتیا بجلی نا پیدوار ممکن مریک بلکن کبین ایندھن نا درآمد ءِ کم کرسا نہادی زرمبادلہ بچفنگ مریک۔ دیوان ءِ پین پاننگاکہ پاکستان اٹی الیکٹرک بس و گاڈی تیکن صنعت و انفراسٹرکچر نا تفنگ آن نئے بیرہ پاکستان نا درآمدی بل اٹی خاطر خواہ کمتی بریک بلکن دا صنعت نا تفنگ آن ملک اٹی پیشن نا زرکاری و روزگار نا وارخواہی ودی مریک۔ وزیراعظم دیوان اٹی تعلقدار کمامدار آتے دا بابت جوان پلان اس زوت پیش کننگ و وزارت صنعت و پیدوار ، پاور منسٹری و زرکاری بورڈ ءِ دا بشخ اٹی زرکار آتے ہرممکن آسراتی فراوان کننگ نا ہم پارت جاری کرے۔
