اسلام آباد۔ 21 اکتوبر (اے پی پی) صدر مملکت ڈاکٹر عارف علوی ترند رفتار اقتصادی شونداری ءِ پک کننگ کن اکاؤنٹنگ و مالیاتی بشخ اتون اوار ملک انا غٹ بشخ آتیٹی ڈیجیٹل ٹیکنالوجی و آئی ٹی ٹول آتون اوار جد ءِ تینا کننگ نا گرج آ زور شاغسا پارینے کہ پاکستان ءِ تینا تعلیمی نظام اٹی آن لائن و ہائبر ڈ ہیل کننگ نا وڑوڈول آتے تینا کرسا یونیورسٹی آن فارغ مروک آ بندغ و کسبی بندغ آتا کچ اٹی ودکی کننگے۔ صدر مملکت داخیال آتا درشانی ءِ داڑے ایوان صدر اٹی انسٹی ٹیوٹ آف چارٹرڈ اکاؤنٹنٹس آف پاکستان (آئی سی اے پی) نا کانووکیشن آن تران کرسا کرے۔ صدر آئی سی اے پی اشفاق یوسف تولہ، نائب صدر، اکاؤنٹنگ و مالیاتی بشخ انا باسک و طالب علم آک دود اٹی بشخ ہلکر۔ صدر مملکت فیصلہ ساز و ادارہ غاتیا زور شاغا کہ او اسہ گچین ءُ نظام اس جوڑ کیر تانکہ پوسکن آ و مون آ بروک آ ٹیکنالوجی تے تینا کننگ کن اوفتا خڑچ انا کساس ءِ خلسا اوفتا کاریم اٹ اتنگ ءِ پک کننگ مرے و شون ہلوک دنیا تون ہم گرنچ مننگ کن اوفتے ترندی اٹ تینا کننگ کن انتظامی و کمکار پنجر اس ٹہیفنگ مرے۔ اوسرکاری بشخ اکن اکاؤنٹنگ و آٹومیشن نا ’’ڈبل انٹری‘‘ نا نظام ءِ تینا کننگ نا گرج آ زور شاغسا پارے کہ مچ آ دنیا نا زرگزرانک آئی سی ٹی وڈیجیٹل ذریعہ نا کمک اٹ آٹومیشن، ترند رفتار مالیاتی ماڈیولز و رکھ لین دین نا نظام نا کنڈآن ترندی اٹ منتقل مننگ ءُ۔ صدر مملکت پارے کہ پاکستان ءِ چار ٹرڈ اکاؤنٹنٹس تون اوار تربیت یافتہ انسانی وسیلہ و کسبی بندغ آتا بھاز گرج ءِ و اودے تینا تعلیمی نظام اٹی آن لائن و ہائبرڈ ہیل کننگ نا وڑوڈول آتے تینا کرسا یونیورسٹی آن فارغ مروک آ بندغ و کسبی بندغ آتا کچ اٹی ودکی کروئی مرے۔ اوپارے کہ روایتی تعلیمی نظام آن چپ ہائبرڈ و آن لائن تعلیم آن گریجویٹ آتا کچ ءِ ودفنگ اٹ کمک ملنگ کیک۔ اوپارے کہ 2 سال انا ایسوسی ایٹ ڈگری پروگرام آ ہم بایدے سجفنگے انتئے کہ صنعت و مارکیٹ ءِ کسبکار کسبی بند غ آتا بھاز گرجءِ۔ صدر مملکت وزیراعظم نا ڈیجیٹل سکلز پروگرام نا ستاءِ کرے ہرا مچ آ پاکستان اٹی گیشتر تعلیمی پس منظر آن تعلق تخوک آ لکھ آ مخلوق ءِ ڈیجیٹل مہارت فراوان کننگ اٹ کمک کرینے۔
