استنبول۔ 21 اکتوبر (اے پی پی) بنجائی وزیر حوالکاری و شینکاری مریم اورنگزیب تون ترکیہ نا فلمی صنعت نا نمائندہ ڈل جمعہ نادے آ داڑے اوڑدہی کرے۔ اوڑدہی ٹی پاکستان و ترکیہ نا نیام اٹ راگ و فلم انا بشخ آتیٹی کمکاری ءِ مون آ دننگ آ گپ وتران مس وخت اس کہ بنجائی وزیر حوالکاری پاکستانی فلم آتا نمائش کن ترکیہ ٹی فلمی میلہ ٹی پاکستان نا بشخ ہلنگ نا پڑو ءِ کرے۔ فلمی میلہ تاریخ نا تعین ءِ بروک آ ہفتہ ترکیہ ٹی فلمی میلہ نا اڈتننگ نا بابت دیوان اٹی کننگک۔ داوخت آ ڈل اتون گپ وتران کرسا بنجائی وزیر حوالکاری پارے کہ پاکستان اٹی تیار مروک آ مسہ پوسکن آ فلم آتے فیسٹیول اٹی پیش کننگ مریک۔ اوپارے کہ ہڑتوم آ ملک آتا نیام اٹ اسیجائی ڈٹ آتیکن فزیبلٹی اس تیار کننگک۔ اوڑدہی ٹی پاکستان اٹی پوسکن آ فلم پروسیسنگ لیب انا جوڑ کننگ اٹی کمکاری، ترکیہ نا یونیورسٹی تتون تعلیمی نصاب اٹی فلم سازی و اداکاری نا سرحال آتے اوار کننگ کن کمکاری آ ہم امنا کننگا۔ بنجائی وزیر حوالکاری پارے کہ 1970 ء نادہائی ٹی پاکستان دنیا نا مسٹ میکو غٹ آن بھلا فلم جوڑ کروک آ ملک ئسک۔ اوپارے کہ 2008ء ٹی فلمی صنعت نا بحالی نا کاریم بناکرے، نن ملکی تاریخ نا اولیکو فلم اینڈ کلچر پالیسی ءِ جوڑ کرین، فلمی صنعت ءِ خراج اٹی استثنیٰ پوسکن ءُ فلم جوڑ کننگ کن مالی کمکاری نا آسودہی تسن۔ اوپارے کہ پاکستان اٹی فلم آتا تیاری آ 70 درسد اسکان خراج اٹی رعایت تننگانے۔ بنجائی وزیر حوالکاری پارے کہ فلم انا کِسہ، آب، پوسکن آ ٹیکنالوجی نا کاریم اٹ اتنگ قومی فلم پالیسی نا بشخ اسے، داڑان بیدس پوسکن آ سینما گھر تا جوڑ کننگ، بحالی و فنکار آتے آسودہی تننگ کن گام گیج ہم کرینن۔ اوپارے کہ فلم و سیل و سوات نا بشخ اٹی پاکستان نا 70 درسد ورناتے اوار کننگ نا دا جوان ءُ موقع اسے ، ورناتیکن فلمی بشخ اٹی انٹرنیشنل ورکشاپ اڈتننگ انگ ءِ ہرافتے ٹی گچین ساکھ تخوک پروڈیوسر آتے بٹنگنہ۔ مریم اورنگزیب پارے کہ فلم و راگ ہر ملک انا جہانی کہول آ تشخص ءِ گچین کننگ اٹ اہم ءُ کڑد اس ادا کننگ کیک۔ اوپارے کہ پاکستان نا قطبی علاقہ غاک قدرتی حسن آن شُپ ءُ، ترکی نا فلم ساز دا زیبا سیل و سواتی علاقہ غاتیٹی فلم بندی کننگ کیرہ۔ ڈل ترکیہ نا فلمی صنعت نا کنڈآن پاکستان تون فلم اینڈ راگ انڈسٹری ٹی اسیجائی ڈٹ بناکننگ آ آمادگی نا درشانی ءِ کرسا پارے کہ ترکیہ ٹی جوڑ نیدر لینڈز، ترکی و فرانس نا گچین کمپنیک فلم پروسیسنگ لیب اٹی تکنیکی کمکاری فراوان کننگ کیرہ۔
