اسلام آباد۔ 21 اکتوبر (اے پی پی) ایشیائی شونداری بینک (اے ڈی بی ) ساڑی آ بھسکار نوکاپ و رسد اٹی اڑاند آتا رداٹ راجی رکھ، غذائی سلامتی ءِ مون آ دننگ و مخلوق کن روزگار نا وارخواہی فراوان کننگ اٹ کمک نا رداٹ پاکستان کن 1.5 ارب ڈالر نا مالی کمکاری نا منظوری ءِ تسنے۔ دا ہیت ءِ ایشیائی شونداری بینک انا کنڈآن جمعہ نادے آ جاری بیان اٹی پاننگانے۔ ایشیائی شونداری بینک انا بلڈنگ ریزیلینس و د ایکٹوکاونٹر سائکلیکل ایکسپینڈیچرز(بریس) پروگرام نا رداٹ فراوان کروک کمکاری حکومت پاکستان نا کنڈآن یوکرین تنکی تون اوار پیشن نا شاکس آتون مون تننگ نا 2.3 ارب ڈالر نا پروگرام آ عملدرآمد اٹی کمکار مریک۔ ایشیائی شونداری بینک انا ڈائریکٹر جنرل نیامی و دیکی ایشیا یوگینی ژو کوف پارے کہ کوویڈ۔ 19 آن پاکستان نا بحالی ٹی پیشن نا لوڈو تا سوب آن اڑاند ودی مسنے۔ ودوک آ کاروباری و ذاتی خڑچ آک لکھ آ پاکستانی، خاص وڑاٹ نیزگار و زرگزرانی وڑاٹ نزور تپہ غاتے زہمی کرینو۔ اوپارے کہ ایشیائی شونداری بینک انا پروگرام حکومت ءِ بڑز نہاد آتا اثر، غذائی بے رکھی ٹی ودکی، کاروباری سرجزآتیٹی سست روی، و اقتصادی وڑاٹ نزور ٹولی تا کٹیا تے کم انا ویل آتے ایسر کننگ اٹ کمک کیک، پاکستان اٹی ساڑی آ نوکاپ آن ویل آتیٹی ودکی ہم مسنے۔ اوپارے کہ ایشیائی شونداری بینک انا فنانسنگ آن حکومت ءِ شونداری خڑچ آتا پیکج ءِنافذ کننگ کن درکار مالی جاگہ اس فراوان مریک ہرا پاکستان نا نیزگار آ خاہوت آتیکن ڈیزین کننگانے۔ ایشیائی شونداری بینک انا ڈائریکٹر پبلک مینجمنٹ طارق نیازی پارے کہ ایشیائی شونداری بینک انا ساڑی آ کمکاری آن نغد امداد دوئی کروک آخاہوت آتا کچ ءِ 7.9 ملین آن ودفسا 9 ملین اسکان ودفنگک، دا کمکاری آن پرائمری و سیکنڈری اسکول آتیٹی داخل مروک آ چناتا کچ ءِ ودفنگ ، پڈ پُر ، پال کنفوک آ لمہ و چناتیکن جان جوڑی نا خذمت و غذائیت نا فراوانی نا کوریج ءِ ودفنگ اٹ کمک رسینگک۔ داکان بیدس داڑان حکومت ءِ زرگزران ءِ ملوک آ دمدستی لوڈو تا اثرآتون مون تننگ اٹ کمک رسینگک۔
