اسلام آباد۔ 21 اکتوبر (اے پی پی) قومی اسمبلی غیرکانودی وڑاٹ بھارت نا کوزہ ٹی جموں و کشمیر اٹی انسانی حق انا لتاڑنگ نا ترندی اٹ مذمت نا قرارداد ءِ امنائی وڑاٹ منظور کرسا کشمیری الس نا جہد آجوئی و حق خودارادیت نا سیاسی ، سفارتی و اخلاقی مخ تفی ءِ برجاتخنگ نا عزم انا درشانیءِ کرینے۔ جمعہ نادے آ قومی اسمبلی ٹی مولانا عبدالاکبر چترالی دا بابت قرارداد پیش کرے ہرانا ایوان امنائی وڑاٹ منظوری ءِ تس۔ قرارداد نا متن اٹی پاننگانے کہ دا ایوان 27 اکتوبر 1947 ء آ بھارت نا غیر کانودی کوزہ ٹی جموں وکشمیر نا تہار دے ءِ یات کرسا بھارتی فوج انا کنڈآن بھارتی غیرکانودی مقبوضہ کشمیر اٹی برجا ریاستی دہشت گردی و جہانی کانود نا پاش آن پاش خلاف ورزی نا مذمت ءِ کیک۔ دا ایوان بھارتی سلہہ بند فوج انا کنڈآن مقبوضہ کشمیر اٹی 96 ہزار آن زیات بے گناہ شاری تا شہیدی نا مذمت ءِ کیک۔ دا ایوان بھارتی دستور نا آرٹیکل 35 الف و 370 اتی ترمیم نا کمک اٹ مقبوضہ جموں وکشمیر نا غیرکانودی الحاق ءِ مسترد کرسا اقوام متحدہ نا قرارداد آتا برخلاف مقبوضہ جموںوکشمیر اٹی آبادی نا کچ ءِ بدل کننگ نا کوشست آتا ترندی اٹ مذمت ءِ کیک۔ دا ایوان جہانی برادری آن خواست کیک کہ او کمیشن آف انکوائری اس ٹہیفسا مقبوضہ کشمیر اٹی انسانی حق انا لتاڑتا نوٹس ءِ ہلے۔ دا ایوان حق خودارادیت کن کشمیری الس نا عزم و جہد نا پوسکنی و پک کیک و داہیت انا درشانی ءِ کیک کہ پاکستان کشمیری تااخلاقی ، سفارتی و سیاسی مخ تفی ءِ برجاتخک۔
