اسلام آباد۔ 21 اکتوبر (اے پی پی) بنجائی وزیر تخفیف نیزگاری و راجی رکھ شازیہ مری پارینے کہ زیات تر نوکاپ زہمی علاقہ غاتیان دیر شیف تمانے، اومیت ءِ کہ ملک ءِ خور اناکمتی تون مون تروئی تمپک، نوکاپ آن مروک آ بھسکاری نا سوب آن ملک اٹی نیزگاری نا کچ ودانے، بے نظیر انکم سپورٹ پروگرام نا رداٹ امداد نا بشخنگ اٹی ہراڑے کمتی اس رہینگانے ، گچین مروک نمائندہ غاک ویل آتا پیدواری ءِ کیر نن اوفتے پورو کینہ۔ جمعہ نا دے آ قومی اسمبلی ٹی وقفہ سوج آتیٹی شمس النسانا سوج انا ورندی ٹی بنجائی وزیر شازیہ مری پارے کہ بھسکارنوکاپ و پِر تیٹی ورلڈ بینک انا بیان نا رداٹ ملک اٹی نیزگاری ودانے۔ وزیراعظم غٹ صوبہ غاتے پارت کرینے کہ تینا تینا صوبہ غاتیٹی نیزگاری نا کچ انا کساس ءِ خلیر۔ اوپارے کہ نیزگاری نا بابت ننے بھاز گڑتی ءِ، نن گام گیج کننگ اُن و غٹ گام گیج آتیان قومی اسمبلی ءِ معلومدار ہم کینہ۔ آسیہ عظیم نا ضمنی سوج انا ورندی ٹی شازیہ مری پارے کہ یقینی وڑاٹ دا بزرگ بندغ آتیکن زیات آسراتی و اولڈ ہوم تا کچ زیات مرے۔ ننا ملک انا دیکی نا مقابلہ ٹی کلچر ہنداوڑنا ءِ کہ مخلوق بزرگ آتے داڑے اول ہوم تیا گدریفپک۔ اوپارے کہ اسکول آن پیشن چناتے اسکول آتسکان اتنگ کن آسراتی توتننگک۔ پاکستان سویٹ ہوم تا فنڈ داخس اف کہ ہمو غٹ چناتے پاکستان سویٹ ہوم تیٹی داخل کننگ مرے۔ ڈاکٹر مہرین رزاق بھٹو نا سوج انا ورندی ٹی شازیہ مری پارے کہ نوکاپ آن زہمی بندغ آتیٹی بے نظیر انکم سپورٹ پروگرام نا کمک اٹ 70 ارب روپئی نا زر اٹی بیست ءُ پنچ ہزار روپئی امداد نا بشخنگ جوانی اٹ بشخنگانے۔ نن باور کرفنہ کہ ہراڑے ہراڑے گچین مروک آ نمائندہ غاک ویل آتا پیدواری ءِ کیرہ نن اوویل آتے ایسر کینہ۔ ہرا نوکاپ زہمی علاقہ غاتیٹی داسہ ہم دیر سلوک ءِ، وزیراعظم المی گام گیج کننگ نا پارت کرینے۔ زیات تر علاقہ غاتیٹی دیر شیف تمانے و خور انا کاختی ودی مننگ نا گڑتی سلتنے۔ اوپارے کہ نوکاپ زہمی علاقہ غاتیان بیدس ہم بے نظیر انکم سپورٹ پروگرام نا رداٹ 34 ملین رجسٹرڈ بندغ آتا ڈیٹا ساڑی ءِ، نن زوت داکنڈآ کانہ۔ شیخ روحیل اصغر نا سوج انا ورندی ٹی شازیہ مری پارے کہ بےنظیر انکم سپورٹ پروگرام نا بجٹ 364 ارب روپئی نا ءِ۔ حکومت داوار اسہ بھلو زر اس جتا کرینے۔ بی آئی ایس پی نا کیہی پروگرام اٹی قطار اٹ سلفسا امدا د ہلنگ و تننگ ءِ اسٹ اس ہم پسند کپک۔ نن خوانہ کہ زالبول آتا بینک اکاؤنٹ آتے ملنگے و دا امداد نا دوئی کننگ کن لین اٹی سلپس۔ نن ادائیگی نا بابت باسک آتا سلاہ تا ستاءِ کینہ۔
