اقوام متحدہ۔ 21 اکتوبر (اے پی پی) پاکستان بھارت ءِ بھلو کچ اسے آ روایتی سلہہ غاتا بہاآ گڑتی نا درشانی ءِ کرسا پارینے کہ دا سویلی ایشیاٹی نزوری ءِ ودفنگ ءِ و علاقہ ٹی واک انا توازن ءِ خطرہ ٹی شاغنگ ءِ۔ جنیوا ٹی اقوام متحدہ نا دفترآتیٹی پاکستان نا آخبتی نمائندہ خلیل ہاشمی نیویارک اٹی جنرل اسمبلی نا سلہہ غاتا چٹفنگ و جہانی سلامتی نا امور نا فرسٹ کمیٹی ٹی روایتی سلہہ غاتیا تران کرسا پارے کہ سویلی ایشیا کن سلہہ غاتا بابت دہرامعیار نا پالیسی ءِ بایدے اِلنگے ، ہرا محدود اسٹریٹجک ، سیاسی و واپاری پلوآتیان تالان ءِ۔ اوپارے کہ پاکستان سویلی ایشیا ٹی سٹریٹجک سوگوی کن سنبرینگوک ءِ ہراٹی روایتی واک انا توازن نا عنصر اوار ءِ۔ پاکستانی نمائندہ پارے کہ پاکستان ڈیہہ ٹی سلہہ غاتا رُمب اٹی بشخ ہلتنے، و نئے اوٹی بشخ ہلنگ خواہک۔ اوپارے کہ دا کمیٹی مسہ دہائی آن زیات وخت اٹی علاقائی و ذیلی علاقائی کہول آتیا روایتی سلہہ غاتا کنٹرول نا مون آ دننگ نا بابت پاکستان نا قرارداد ءِ منظور کرینے ہرانا بنداو غٹ ریاست آتا بدل مفروک سلامتی، فورسز و روایتی سلہہ غاتا متوازن کمتی نا اصول آتیا ٹی ءِ۔ بھارت نا پِن ءِ ہلنگ آن بیدس پاکستانی سفیر پارے کہ بھلو کچ اسے آ سلہہ غاتا بہا سویلی ایشیا ءِ نزوری آن دوچار کروک آ پیش رفت ءِ ہراڑان دا پیدوار مریک کہ سویلی ایشیا ٹی اسہ ہندن ءُ ریاست اس ارے ہرانا فوجی خڑچ آک ایلو غٹ ملک آتا مقابلہ ٹی بھاز زیاتءُ۔ اوپارے کہ داریاست ءِ روایتی سلہہ غاتا فراخدلی اٹ فراوانی آن نئے بیرہ اونا سٹریٹجک لائخی تیٹی ودکی نا سو ب ءِ بلکن ڈیہہ ٹی نزوری ءِ تہوتننگ اٹی ءِ، علاقائی توازن ءِ خطرہ ٹی شاغنگ ءِ، متکن آ جھیڑہ غاتا ایسری ٹی اڑاند مننگ ءِ۔
