اسلام آباد ۔ 20 اکتوبر (اے پی پی) وزیراعظم محمد شہباز شریف خیبر پختونخوا و پنجاب نا حکومت آتیان خواست کرینے کہ او بڑزکو آب انا بج بشخنگ نا بنجائی حکومت نا پروگرام اٹی اوار مریر و اودے سیاسی ویل اس جوڑ کپس، پاکستان ننا غٹ انا سانجھاءِ، جندی و سیاسی پسند و ناپسند و فائدہ غاتیان ایڑتر مرسا نوکاپ زہمی تا کمک کن کاریم کننگے، بنجائی حکومت نجی بشخ ءِ اسُل خولم درآمد کننگ نا موکل تفک، دا مشکل حالیت آتیٹی کس اسے ناروا منافع خوری کننگ و الس آ بھاریم شاغنگ کن اِلیپنہ۔ او پنچ شنبے نادے آ داڑے تینا کماشی ٹی نیشنل فلڈ ریسپانس اینڈ کوآرڈنیشن سینٹر اٹی اڈ ہلوک جاچ دیوان آن تران کریکہ۔ داوخت آ بنجائی وزیر احسن اقبال ، طارق بشیر چیمہ ، ایاز صادق، شیری رحمان، خرم دستگیر آن بیدس این ڈی ایم اے ، این ایف آر سی سی و بڑزکو صوبائی کمامدارآک ہم ساڑی ئسر۔ وزیراعظم پارے کہ نوکاپ زہمی تا کمک ، بحالی و آبادکاری نا کاریم اٹی نن سیاست آن بایدے پورو پاناد کین، بنجائی حکومت زہمی تا بحالی و ریلیف کن پبی وڑاٹ کاریم کرینے۔ داتم اسکان 66 ارب روپئی زہمی تیٹی بشخنگانے۔ اسہ لکھ 10 ہزار خاہوت آتے دا زءِ زوت گدریفنگک۔ بنجائی حکومت ہرچار آ صوبہ و گلگت بلتستان و آزاد کشمیر اٹی غٹ زہمی تیکن گام گیج کرینے و زوال کروک آتا خاہوت آتے 10 لکھ روپئی فی کس نا پیکج تسونن۔ نوکاپ آن 1700 آن زیات بندغ زوال کرینو۔ این ڈی ایم اے شفاف وڑاٹ دا زر ءِ بشخانے۔ بنجائی حکومت نا کنڈآن داتم اسکان اونا بشخ انا رداٹ 88 کروڑ روپئی بشخنگانے۔ ٹھپی مروک آتیکن ہرا پیکج ءِ تننگاسس اونا بشخنگ ہم برجاءِ۔ ہر چار آ صوبہ و زہمی علاقہ غاتیٹی این ڈی ایم اے نا کمک اٹ خور، دوائی، تمبو، مچھردانی و دیر گرج انا رداٹ تننگانے و ہر صوبہ نا گرج ءِ مون آ تخنگانے۔ وزیراعظم پارے کہ سنگت و ایلم ملک آتا کنڈآن ہرا امداد بس اوفتے این ڈی ایم اے پی ڈی ایم اے تتون اواری اٹ غٹ صوبہ غاتیٹی شفاف وڑاٹ کمکی گڑاتے بشخانے۔ چین نا کنڈآن یخ آتیکن ونٹر ٹینٹ گدریفنگ انگ ءِ اوفتے ہم غٹ زہمی علاقہ غاتیٹی گرج انا رداٹ بشخنگک۔ وزیراعظم پارے کہ بنجائی حکومت نا کنڈآن خولم نا بوائی کن بنجائی وزیر طارق بشیر چیمہ و احسن اقبال صوبہ غاتون اواری اٹ ففٹی ففٹی نا بنداو تیا بج انا فراوانی نا ڈٹ اس جوڑ کرینو ہرادے این ڈی ایم اے نا کمک اٹ ایسر اسکان سرکننگک۔ بروک آ فصل اکن بڑزکو آب انا بج دوئی کننگک۔ سندھ و بلوچستان دا بابت کاریم کننگ اٹی ءُ ولے خیبرپختونخوا و پنجاب نا صوبائی حکومت آک ننا درخواست آن پد ہم دا ڈٹ اٹی اوار مننگ آن انکار کرینو و ورندی تسنو کہ ننے بج درکار اف۔ وزیراعظم پارے کہ پاکستان ننا غٹ انا سانجھا ءِ و دا ننا غٹ انا اسیجا ملک ءِ۔ ہر چار آ صوبہ غاک پاکستان نا بشخ ءُ و بنجااکائی تتون اواری اٹ جوڑ مریک۔ دا باندات اٹی ہچ ءُ سیاست اس اف۔ جندی و سیاسی پسند و ناپسند آن ایڑتر مرسا غٹ صوبہ غاک دا پروگرام اٹی اوار مریر و اگہ صوبہ اس اوار مننگ خواپک تو اودے سیاسی رنگ تننگپ۔ بی آئی ایس پی نا رداٹ 70 ارب روپئی بشخنگوئی ءِ، تمبو، مچھردانی و دیر اتون اوار ارب آ روپئی نا گڑا شفاف وڑاٹ غٹ زہمی علاقہ غاتیا گدریفنگانے۔ نوکاپ آن ہندن ءُ بھسکاری اس مسنے ہرا مہالو مون آ بتنے۔ تدوک آ دے ای صحبت پور نا دورہ ءِ کریٹ ہموڑے داسکان دیر سلوک ءِ، اول نوکاپی دیر تیان بھسکاری مس و داسہ سلوک آ دیر آن ودی مروک آ ناجوڑیک تالان مننگ اٹی ءُ۔ وزیراعظم پارے کہ ففٹی ففٹی فارمولا غا سندھ و بلوچستان نا حکومت آک راضی ءُ ولے اگہ پنجاب و خیبرپختونخوا ءِ بج درکار اف تو دا اوفتا تینا فیصلہ ءِ۔ وزیراعظم پارے کہ خولم نا درآمد نا بابت کساس ءِ خلنگانے، پلاننگ، خزانہ، غذائی رکھ و کامرس نا وزارت آک اواری اٹ دا بابت کاریم کرینو۔ تدوک آ سال انا خولم نا ہرا کاختی ئسک اودے ہم پورو کننگک۔ حکومت کیہی لکھ ٹن خولم درآمد کرینے۔ نوکاپ نا سوب آن نن خولم نا پیدوار نا ہدف ءِ پورو کننگ کپنہ۔ وزیراعظم پیدوار کرے کہ او نجی بشخ ءِ خولم درآمد کننگ نا اسُل موکل تفک۔ داوڑ مننگ کپک کہ پرائیویٹ سیکٹر تینامنشا نا نہاد آ خولم بٹنگے۔ ای کس اسے آ دوبہ خلپننگ اُٹ و نئے شک کننگ اٹی اُٹ۔ غٹ صوبائی حکومت آک کنکن شرف نا قابل ءُ ولے ننے بھسکاری نا مون تروک ءِ و درملکی زرمبادلہ نا مشکل باندات مون تروک ءِ۔ بنجائی حکومت بھاز گچین کارکڑد نا درشانی ءِ کرسا ارب آ روپئی تے بچفینے و کم آن کم بولی تروک آتون ہم گپ وتران کرسا نہاد آتے پین کم کرفینن۔ دا ایمرجنسی نا حالیت آتیٹی نن اسہ ڈالر اسے ہم زیات خڑچ کننگ ءِ سگپنہ، ہنداخاطرآن مہالو ہرا 440 نا بڈ بس اودے ای امنا کتوٹ کنے منشورہ تننگا کہ اودے امنا کننگے دُن مف کہ اوڑان ہم زیات نہاد آ خولم ہلوئی تمے ولے نن رسک ہلکن و 30 ڈالر فی ٹن بچفین۔ دااللہ ناکرم ئسک۔ وزیراعظم پارے کہ نجی بشخ ءِ عام حالیت آتیٹی خولم درآمد کننگ نا موکل تننگ مریک ولے دا حالیت آتیٹی نن کس اسے ناروا منافع خوری و الس آ بھاریم شاغنگ نا اسُل موکل تفنہ۔
