اسلام آباد۔ 20 اکتوبر(اے پی پی ) وزیراعظم محمد شہباز شریف پارینے کہ نوکاپ آن زہمی اُراتا تفنگ کن اولیتی بنداو تیا لائحہ عمل اس تیار کننگے و نوکاپ زہمی علاقہ غاتیٹی بحالی کن شونداری کاریم تا پی سی ون ءِ چار دے انا تہہ ٹی گڈیکو دروشم اس تننگے۔ داپارت آتے او تینا کماشی ٹی نیشنل فلڈ ریسپانس اینڈ کوآرڈنیشن سینٹر نا جاچ دیوان اٹی تس۔ دیوان اٹی بنجائی وزیر آک، چیئرمین این ڈی ایم اے، چیئرمین این ایف آر سی سی و تعلقدار ادارہ غاتا بڑزکو کمامدار آک بشخ ہلکر وخت اس کہ وزیراعلیٰ سندھ و ہر چار آ صوبہ غاتا چیف سیکرٹریک ویڈیو لنک انا کمک اٹ بشخ ہلکر۔ وزیراعظم پارے کہ نوکاپ کون آ قدرتی آفت آ سیاست آن پاناد کننگے، تباہ حال پاکستانی تا آسودہی کن ننےسیاست ءِ اسہ کنڈتخسا زہمی تا کمک وبحالی کن عملی گام گیج کروئی ءِ۔ نوکاپ آن زہمی اُراتا تفنگ کن اولیتی بنداو تیا لائحہ عمل اس تیار کننگے۔ وزیراعظم پارے کہ یخ انا موسم اٹی نوکاپ آن تباہ حال مخلوق ءِ یخ انا موسم نا رحم وکرم آ اِلنگ کپنہ۔ وزیراعظم پارے کہ وزیر قومی غذائی رکھ صوبہ غاتون اواری اٹ خولم نا طلب نا کساس ءِ خلے۔ ساڑی آ حساب وکتاب نا رداٹ خولم نا بروک آ فصل اسکان طلب نا رداٹ کوڑی ساڑی ءِ۔ نن مصنوعی کاختی ودی کننگ کن الیپنہ نئے صوبہ اسے ملک انا نہادی زرمبادلہ ءِ کبین خولم ہلنگ آ خڑچ کننگ کن اِلینہ۔ بنجائی حکومت جہانی منڈی آن اڑزان نرخ آتیا خولم درآمد کرسا صوبہ غاتے اوفتا گرج آتا رداٹ فراوانی ءِ پک کیک۔ وزیربجلی نوکاپ زہمی علاقہ غاتا تینٹ دورہ ءِ کرسا بجلی نا فراوانی ءِ پک کے۔ ہمو علاقہ غاتیٹی بجلی نا فراوانی ءِ پک کننگے ہراڑے نوکاپی دیر انا کشنگ کن پمپ چلیفنگ انگ ءِ۔ نوکاپ زہمی علاقہ غاتیٹی بحالی کن شونداری کاریم تا پی سی ون ءِ چار دے انا تہہ ٹی گڈیکو دروشم اس ترسا منظور کننگے۔ دیوان ءِ پاننگاکہ نوکاپ زہمی تا بحالی کن جوان ڈٹ بندی تینا گڈیکو ریسہ ٹی ءِ و 24 اکتوبر آ بنجائی حکومت، صوبائی حکومت و جہانی ادار ہ غاتا کمک اٹ تیار مروک سرجم قدرتی آفت آن پد گرج آتا کساس نا رپورٹ اس پیش کننگک۔ وزیراعظم جہانی ڈونر آتے پیش کننگ کن نوکاپ زہمی تا بحالی نا جوان لائحہ عمل اس زوت پورو کننگ نا پارت جاری کرے۔ دیوان اٹی وزیراعظم ءِ بینظیر انکم سپورٹ پروگرام نا کنڈآن وزیراعظم فلڈ ریلیف کیش پروگرام نا رداٹ زہمی خاہوت آتیٹی 25 ہزار فی اُرانا زر انا بشخنگ آ پیش رفت آن معلومدار کننگا۔ دیوان ءِ پاننگاکہ مچ آ ملک اٹی داتم اسکان 26 لکھ اُراتیٹی 66.22 ارب روپئی نا زر بشخنگانے ہراٹی غٹ آن زیات سندھ ہراٹی کم و ود 18 لکھ اُرا، خیبرپختونخوا 3لکھ 15 ہزار اُرا و بلوچستان اٹی 2 لکھ چل ہزار اُرا تیٹی دا زر ءِ بشخنگانے۔ دیوان اٹی چیئرمین این ڈی ایم اے ریسکیو، ریلیف و بحالی نا گام گیج آتیان معلومدار کرسا پارے کہ جم وڑاٹ سندھ اٹی کم وود 1 لکھ 23 ہزار، بلوچستان اٹی 1 لکھ و خیبرپختونخوا ٹی 64 ہزار تمبو فراوان کننگانے وخت اس کہ سندھ اٹی 15 لکھ و بلوچستان اٹی 5 لکھ مچھردانی فراوان کننگانے۔ ہندا وڑ نوکاپ زہمی علاقہ غاتیٹی راشن تننگ تون اوار اوار کشتی، دیر انا کشنگ کن پمپ آتا ہم بھلو کچ اسے نا فراوانی ءِ پک کننگا۔ دیوان ءِ داہم پاننگاکہ این ڈی ایم اے نا کنڈآن بنجائی حکومت نا زوال کروک آ بندغ آتا خاہوت آتیکن 10 لکھ و ٹھپی مروک آتیکن امداد نا مد اٹی کم و ود 88 کروڑ روپئی بشخنگانے ہراکہ نسخان تا 90 درسد ءِ۔ دیوان ءِ مستی پاننگاکہ صوبہ سندھ اٹی دریائے سندھ انا دے ٹکی و دیکی کنارہ غاتیا نوکاپی دیر انا کشنگ کن واٹر پمپ خلنگانے و ہرا علاقہ غاتیٹی بجلی نا فراوانی ٹی اڑاند ءِ ہموڑے جنریٹر آتا فراوانی ءِ پک کننگانے۔ وزیراعظم ءِ چیف سیکرٹری بلوچستان نا کنڈآن بلوچستان اٹی یخ انا موسم نا سوب آن نوکاپ زہمی تا مشکل و صوبائی و بنجائی حکومت آتا کمکی کارروائی تا بابت معلومدار کننگا۔ وزیراعظم ہمو علاقہ غاتیٹی ہراڑے یخ انا شدت اٹی ودکی مننگ ءِ، نوکاپ زہمی تے یخ انا موسم کن چین نا کنڈآن عطیہ کروک آ خصوصی تمبو تا دمدستی فراوانی نا پارت جاری کرے۔
