اسلام آباد۔ 20 اکتوبر (اے پی پی) وزیراعظم محمد شہباز شریف یخ انا موسم اٹی بجلی نا طلب و رسد آ سخت نظر تخنگ و صارف آتے زیات آن زیات ریلیف تننگ کن المی گام گیج کننگ نا پارت کرینے، وزیراعظم شہباز شریف نا کماشی ٹی پنچ شنبے نادے آ اسہ اہم ءُ دیوان اس اڈ ہلک ہراٹی یخ انا موسم اٹی بجلی نا لوڈشیڈنگ نا مون ءِ توننگ کن چندی سلاہ تیا سجفنگا۔ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم ءِ وزارت توانائی یخ انا موسم اٹی بجلی نا طلب و رسد و ایندھن نا کساس آتیا سرجم حوال تس۔ وزیراعظم تعلقدار کمامدارآتے پارت کرے کہ یخ انا موسم اٹی بجلی نا صارف آتے زیات آن زیات ریلیف تننگ کن غٹ المی گام گیج کننگے۔ وزیراعظم داہیت انا ہم پارت کرے کہ بجلی ودی کننگ کن درآمدی ایندھن آ کم آن کم سیبو ءِ کننگے و ہندی وسیلہ غاتے کاریم اٹ اتسا الس ءِ اڑزان بجلی تننگے۔ اوڑدہی ٹی مسکوہی وزیراعظم و مسلم لیگ (ن۹ نا قومی اسمبلی نا باسک شاہد خاقان عباسی ، وزیر خزانہ محمد اسحاق ڈار ، وزیر پارلیمانی امور مرتضیٰ جاوید عباسی ، وزیر توانائی انجینئر خرم دستگیر ، وزیراعظم نا سلاہکار احد چیمہ، وزیر مملکت پیٹرولیم ڈاکٹر مصدق ملک ، خصوصی کمکار ڈاکٹر جہانزیب خان، جنید انور چوہدری و تعلقدار بڑزکو سرکاری کمامدارآک بشخ ہلکر۔
