اسلام آباد۔ 20 اکتوبر (اے پی پی) وزیراعظم نا خصوصی کمکار امور کشمیر قمر زمان کائرہ پارینے کہ ساڑی حکومت ہر فورم آ کشمیر نا جھیڑہ ءِ پبی وڑاٹ ہرفیے ، کشمیر نا جھیڑہ نا بابت اقوام عالم تون اوار اوار ہندی کہول آ ہم آگاہی نا گرج ءِ، بھارت واک انا زور آ کشمیر نا جھیڑہ نا ایسر ءِ پدسلفنگ کیک ولے زیات ہرے اسکان کشمیری تے محکوم تخنگ کپک۔ او پنچ شنبےنادے آ داڑے وزارت امور کشمیر و گلگت بلتستان نا کنڈآن بھارت نا غیر کانودی کوزہ گیری ٹی جموں وکشمیر نا ساڑی حالیت آتا رداٹ کانودی پلو و پیش بندی نا سرحال آ اڈ ہلوک جوڈیشل سلابتی کانفرنس آن تران کریکہ۔ اوپارے کہ کشمیر نا جھیڑہ غا جوڈیشل سلابتی کانفرنس نا مسخت کشمیری نا مقدمہ غا کانودی راہشونی دوئی کننگ ءِ ، کشمیر تقسیم برصغیر نا بے پورو ایجنڈا ءِ، پاکستان کشمیر نا جھیڑہ نا ایسری کن سنبرینگوک ءِ، بھارت چرجوئی اٹ اقوام متحدہ نا قرارداد آ عملدرآمد آن انکاری ءِ، او اقوام عالم و اقوام متحدہ ناقرارداد آتیان چکار ءِ اینک کننگ کن کوشست کننگ ءِ، اونا گام گیج دا ویل ءِ پدپشت تخنگ ءِ، ساڑی آ ترمیم اونا اسہ پین کوشست اسے، ہموڑے آبادی نا کچ ءِ بدل کننگ کن غیر ریاستی باتی تے ڈومیسائل نا جاری کننگ و وونٹ انا حق تننگ انگ ءِ۔ داڑکن بھارت اسرائیل نا فلسطین اٹی آزموندہ غان راہشونی ہلنگ ءِ۔ اوپارے کہ کشمیر اٹی حریت پسند آک تینا قربانی تے اٹ دا ویل ءِ زندہ تخانو، ہراقوم داخہ در قربانی ایتے اودے زیات ہرے اسکان محکوم تخنگ مفک۔ اودے مرغن کننگ مریک التواٹی تخنگ مریک ولے زیات ہرے اسکان اودے دا حق آن محروم تخنگ مفک۔ اوپارے کہ کشمیر نا جھیڑہ و کرکٹ آ مچ آ قوم یکجاءِ، کشمیری تتون پاکستان نا است سُرک۔
