اسلام آباد۔ 20 اکتوبر (اے پی پی) قومی اسمبلی ءِ پاننگانے کہ موسمیاتی بدلی تتون مون تننگ نا گام گیج آتیٹی صوبہ غاتا کڑد زیات اہمیت تخک، بنجائی حکومت موسمیاتی بدلی تا بابت تینا کڑد ءِ ادا کننگ اٹی ءِ۔ پنچ شنبے نادے آ قومی اسمبلی ٹی موسمیاتی بدلی تا بابت مہرین رزاق بھٹو و ایلوفتا چکاری نوٹس آ پارلیمانی سیکرٹری ناز بلوچ ایوان ءِپارے کہ ہرا باسک آک چکاری نوٹس جمع کرفینو او ایوان اٹی افس۔ اوپارے کہ واکداری تا بشخنگ آن پد ہر صوبہ ٹی وزیر چاگڑد ساڑی ءِ۔ غٹ صوبہ غاک بنجانا کنڈآن شجرکاری و ایلو ڈٹ آتیٹی تینا کڑد ءِ ادا کننگ اٹی ءُ ہنداخاطرآن موسمیاتی گام گیج آتا بابت صوبہ غاتیان معلومداری دوئی کننگے، بنجائی حکومت اسلام آباد کیپٹل ٹیریٹری نا بابت گام گیج آتا سرجم آتے پیش کننگ کیک۔ عالیہ کامران نا سوج آ بنجائی وزیر شیری رحمان ایوان ءِ پارے کہ اسلام آباد اٹی نوکاپ بتنے، وزیراعظم داسہ ہم ہفتہ ٹی اِرا وار نوکاپ آن زہمی علاقہ غاتا دورہ ءِ کننگ ءِ و میٹنگ ہم کننگ ءِ۔ وزیراعظم اقوام متحدہ نا فورم آ دا بابت ہیت کرینے۔ اقوام متحدہ نا سیکرٹری جنرل پاکستان نا دورہ ءِ کرے و تینا خن تے اٹ بھسکاری ءِ خنا۔ اوپارے کہ ننا ڈیہہ ہندن ءِ کہ داڑے موسمیاتی نظام بریک کاہک ولے داوار سندھ اٹی 7 گنا زیات پِر مسنے، نن پِرتے توننگ کپنہ۔ میر غلام علی تالپور نا سوج آ او ایوان ءِ پارے کہ وزیراعظم چاہندار آتیان ہم سلاہ بٹنگانے و اوفتے تون سلابت کننگ ءِ۔ چاگڑدی بدلی تیٹی پاکستان نا بشخ بھاز کم ءِ وخت اس کہ نسخان زیات مننگ ءِ۔ اوپارے کہ موسمیاتی بدلی تا بابت بنجائی حکومت اسہ حداسسکان انتظامی گام گیج کننگ کیک۔ صوبہ غاک دا بابت زیات کڑد ادا کننگ کیرہ۔ بنجائی حکومت موسمیاتی لحاظ اٹ جوان کشت وکشار نا بابت ہم گام گیج کرینے۔ نوکاپ آن زہمی علاقہ غاتیٹی بنجائی حکومت خولم نامفت بج تننگ ءِ۔ اوپارے کہ سندھ چاگڑدی بدلی تا بابت پالیسی اس جوڑ کرینے، ایلو صوبہ غاک ہم دا چرجوئی ٹی تینا زمواری ءِ ادا کیر۔
