اسلام آباد۔ 20اکتوبر (اے پی پی) بنجائی وزیر قومی غذائی رکھ و پٹ وپول چوہدری طارق بشیر چیمہ پارینے کہ نوکاپ آن زہمی علاقہ غاتیٹی کشت و کشار نا بحالی ننا اولیت ءِ، زہمی کشارگر آتےخولم نا مفت بج تننگ انگ ءِ، ہرا علاقہ غاتیٹی خولم دسنگ مفک ہموڑے آئل سیڈآتا دسنگ کن بست وبند کننگانے۔ پنچ شنبےنادے آ قومی اسمبلی ٹی جاوید حسنین نا اعتراضی ٹک انا ورندی ٹی اوایوان ءِ پارے کہ زہمی تا بحالی کن حکومت تینا کوشست کننگ ءِ۔ زہمی علاقہ غاتیٹی دیر بھاز شیف ہنانے ،خولم نا دسنگ کن زیات ڈغار تیار مننگ ءِ، ہرا علاقہ غاتیٹی خولم نا دسنگ مفک ہموڑے آئل سیڈ آتا دسنگ نا ڈٹ بندی کننگانے۔ وزیراعظم جہانی بینک انا ڈٹ آتیان پنچ ارب روپئی نا دُوارہ تخصیص کرینے۔ وزیراعظم پین چار ارب روپئی پی ایس ڈی پی نا اسہ پروجیکٹ اسے آن فنڈ گدریفینے تانکہ زہمی ضلع غاتیٹی خولم نا بج فراوان کننگ مرے۔ بنجائی حکومت بے نظیر انکم سپورٹ پروگرام نا کمک اٹ زہمی تے نغد امداد نا فراوانی نازیات تر کاریم ءِ پورو کرینے۔ اوپارے کہ گچین دوئی بج آتا لڑ ءِ این ڈی ایم اے ءِ تننگانے۔ بج آتا وڑتا لڑ اس بلوچستان و سندھ انا حکومت آک فراوان کرینو۔
